Chanchin thar thenkhat :

Ni zawn-in Covid kai an thi

Mizoram-a COVID-19 hri kai hmuhchhuah zingah ni zawn-a nunna chan awmin Mizoram-a hri kai zingah nunna chan mi 4 an awm ta. Thu-dawn danin Oct. 28, 2020-a COVID-19 hri kai hmuhchhuah C. Lalthanga (70), Dinthar Veng, Aizawl chu Zirtawpni zan dar 10:40 khan ZMC ah a boral a, an Veng hi hri leng avanga Containment Zone-a puan mek a nih avang leh a chhungte zingah hri kai enkawllai an la awm avangin a ruang hi an In-ah la lovin Inrinni khan vuiliam a ni. Hetihlai hian Inrinni zan dar 11:30 khan Dr. K. Lalnuntluanga (34) s/o Dr. K. Remmawia, Durtlang chu ZMC-ah a boral ve leh bawk a, Dr. K. Lalnuntluanga hi Oct. 27, 2020 khan hri a kai tih hmuhchhuah niin ZMC-ah hian enkawl zui a ni a, a boral hnuah nimin khan a ruang hi vuiliam a ni. Heti hian Mizoram-a COVID-19 hri kai hmuhchhuah zingah nunna chan mi 4 an awm ta a ni.

Champhai Leilet humhalh

Champhai Town huamchhung Leilet zawl a dan phalloh-a In leh Kudam sak te chu kumin December ni 15 hmaa thiat tura tih an ni. Champhai District Bawrhsap chuan kum 1989-a sawrkar thuchhuakin Champhai Town-a In sak theihna a puan huamchhungah Phaizawl Leilet hmun chu telh a nih loh thu leh Phaizawl bik chu humhalh tlat anih thu a chhuah a, Mizoram Revenue danin a sawi anga Agriculture LSC, Periodic Patta leh Garden Pass-te, pass pek a nihna ang taka huan siam nan ni lo, thildang atana hmante chu December ni 15, 2020 hma ngei a thiat turin a hriattir a ni.

ASEP in Award dawng dawn

Nungcha humhalh kawnga thawk thate hnena Balipara Foundation ten kumtin-a chawimawina an hlan thin, 'Balipara Foundation Awards, 2020' dawng turin Association for Environmental Preservation, Mizoram (ASEP) chu thlan an ni a, thla thar December 5 khian chawimawina hi hlan an ni dawn a ni.

MPCC in CM an dem

Mizoram Pradesh Congress Committee (MP-CC) chuan Inrinni khan thuchhuah siamin tunhnaia kan ramri buaiah NEDA-a MNF thawhpui, Assam BJP sawrkar chu a bul tantu a ni zar zar tih an sawi a. Assam BJP sawrkar hi tunhnai buainaah a bul-tumtu a ni tih a chiang chung hian MNF sawrkar hruaitute atangin Assam BJP sawrkar demna tawng-kam pakhatmah hriat tur a awm lova. A tir atanga a tawp thlengin Mizoram Chief Minister Zoram-thanga phei chu a ngawi tluan parh niin an sawi. MPCC chuan ramri chungchanga Mizoram dinna chu Assam Chief Minister leh Union Home Minister te hrilh ngamlo ah Chief Minister chu puhin, tunhnaia ramri-a buaina kan tawh laia Mizoram Home Minister reh lutuk chu ngaihthat thlak loha an hriat thu an sawi bawk.

PC Party Southern Hqrs. din

PC Party chuan Nov. 13, 2020 khan Peo-ples' Conference Party Southern Hqrs. chu Lunglei-ah an dinfel ta tih thuchhuah siama tarlangin, B. Vanlalauva chu President a nih thu leh Vice President-ah C. Zokhuma Advocate leh Treasurer-ah Lalhrima Sailo te an nih thu an tarlang a, tunah hian District dangah pawh PC Party hian hruaitu an insiam chho dawn mek bawk nia tarlangin, Unit engemaw zat din tura ruahmanna siamfel tawh a nih thu leh tunkar atangin din chhoh tan a ni bawk ang tih an tarlang a ni. PC Party Southern Hqrs. President chuanMPC leh PRISM Party inchhun-finin PC Party an din tih sawiin, “Kan hmasawn chhoh dan enin MLA inthlan hmachhawn a chakawm ta hle,” a ti bawk.