Minister in mipui leh sawrkar tanrualna fakawm ti

Information & Public Relations Minister, Lalruatkima chuan hripui do kawngah leh ramri buai chungchangah mipui leh sawrkar tanrualna fakawm a tih thu a sawi.

Inrinni-a Pang Zirlai Pawl (PZP) ten Pang zirlai tithate chawimawina hun Aizawl MZP Conference Hall-a an buatsaih a hmanpuina ah I&PR Minister chuan he thu hi sawiin, hripui leng mek karah mipui ten sawrkarin inkaihhruaina leh kan himna tura a Dan siamte kan zawm thain kan tanrualna in rah tha tak a chhuah zel tih a sawi a, ramdang ngaihtuah chuan kan la ziaawm hle tih sawiin, chutih rualin Covid avanga nunna chan kan awm chu pawi a tih thu a sawi bawk.

Information Minister chuan Assam nena ramri buai karah mipui leh sawrkar thawhhona te, tlawmngai pawl leh Kohhran te tanrualna avangin tun hun hi kan thleng thei tih sawiin, ramri chungchangah sawrkar chu a dinna ngaiah a ding reng dawn a, a tawlh dawn lo tih a sawi a, ni 10 chhung ei bar chak lakna dan chah anih chhungin mipuite tawrhchhelna leh tanrualna avangin sawrkar angin lawmthu a sawi a ni, a ti bawk.

Minister chuan Marksheet-a mark tha ringawt an hlawhtling vek lo tiin zirlaite chu a fuih a, “A tumruh leh a taima apiang tan chauh he khawvel-ah hlawhtlinna a awm a ni,” tiin tum nei tur leh an tum hlen tura theihtawp chhuah turin a fuih bawk a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn