Latest News

Tripura Bru-te Mizoram E. Roll atangin la paih lo; Kum 2018-ah Camp-a Vote nei 11,987 an awm

Election Commission of India (ECI) atanga thu hmuh a la nih loh avangin Tripura Relief Camp hrang hranga awm Bru-te chu Mizoram Electoral Roll atangin paih an la ni lo.

Sawrkar laipui, Mizoram leh Tripura sawrkar aiawh leh Bru aiawhten kumin January 16-a inremna lo ziah tawh ang chuan November 30, 2019 hnu lama Tripura Relief Camp-a la awmte chu an duhthlanna in Tripura-ah an cheng hlen thei dawn a, Bru hruaikir hna lo kalpui tawha Mizorama kir lehte tan erawh Tripura-ah let leh remtih a ni dawn lo thung a. Tripura sawrkar chuan an State chhunga Relief Camp-a cheng mek zat chu enfiahna thar hlak siamin, Resettlement kalpui a nih zawh hnu chuan heng Relief Camp-te hi khar tawh tur a ni.

Mizoram Chief Electoral Office (CEO) hotute chuan Tripura Bru-te Mizoram Electoral Roll atanga paih turin Election Commission atanga instruction an la hmuh loh thu an sawi tih kan thulakna chuan a tarlang a, Instruction an la hmuh loh chhan chu COVID-19 hri leng vanga thiltih zung zung a harsat vang a nih theih thu an sawi bawk a ni.

Kum 2018 Mizoram MLA inthlanpui neihah khan Tripura Relief Camp hrang hrangah Mizoram-a vote nei mi 11,987 an awm a, kumin September-a neih Assembly Session-ah khan General Administration Department (GAD) changtu Chief Minister, Zoramthanga chuan Serchhip bialtu MLA, Lalduhoma zawhna chhangin Tripura-a Bru-te Mizoram Electoral Roll atanga paih tura dilna a la awm tih a lo sawi tawh a ni. 

Hetihlai hian Mizoram Bru Displaced People Forum (MBDPF) General Secretary, Bruno Msha chuan Mizoram Electoral Roll atangin paihfel ni tawhah an inngai tih thuthar thehdarhtute zawhna chhangin a sawi a, Bruno Msha chuan tunhnaia an inbenbelna tur hmun selection an neihah Jampui Mizoten an dodalna hmunte telh a ni tawh lo tih hrilh bawkin, Selection an neih chu sawrkarah thlenin, chumi anga Ressetlement siam a nih an rin thu a sawi bawk.

Comments

Popular News (Last 30 Days)