Hri kai mi 6 enkawl dam leh

Serchhip District-a COVID-19 hri kai mi pathum te chu hri laka an fihlim hnuah Inrinni khan anmahni enkawlna hmun atanga chhuahtir an ni.

Inrinni-a Serchhip-a hri kai enkawl dam tak te hi Oct. ni 19-a Serchhip P&E Veng-a hri kai hmuhchhuah in a lo kawmhnaih an chhuina atanga hri kai hmuhchhuah te niin an vai hian Oct. 20-a hri kai hmuhchhuah niin mipa vek an ni a, a hma lama Rapid Antigen Test hmanga enfiah an nih tuma hri laka la fihlim lo nia hriat pawh TrueNat Laboratory-a a sample enfiahna ah hri lakah a fihlim tawh tih finfiah a nih hnuah chhuahtir an ni ta a ni. Heti hian P&E Veng-a hri kai in a lo kawmhnaih chhuina atanga hri kai hmuhchhuah mi pathum te chu enkawl dam vek an ni ta a ni.

Hetihlai hian nimin khan Serchhip Chan-mari Veng-a hri kai hmuhchhuah mi pathum te pawh enkawl dam an ni ve leh bawk a, heng hri kai enkawl dam tak te hi Oct. 19-a Chanmari Veng-a hri kai hmuhchhuah chhui zuina kalzela Oct. 22-a hri kai hmuhchhuah te niin an vai hian hmeichhia vek an ni a, nimin khan hri lakah an fihlim tih finfiahin chhuahtir an ni ta a ni. Heti hian Oct. ni 19-a Serchhip-a tualchhunga hri inkai-darhna atanga hri kai mi 17 zingah mi 14 te chu enkawl dam an ni ta a, midang 3 enkawl mek an la ni a, an vai hian Chanmari Veng vek an ni.

Heti hian tun dinhmunah Serchhip District-a COVID-19 hri kai hmuhchhuah zawng zawng chu mi 87 niin tun thlengin mi 80 te chu enkawl dam an ni ta a, tunah hian hri kai enkawl-lai mi 7 an la awm mek a. Nimin khan BSF sipai hri kai pathum te chu Nursing School CCC a enkawl tura rawn dah leh niin tun dinhmuna Ser-chhip District-a hri kai enkawllai chu mi 9 an ni thung.

Zirtawpni leh Inrinni khan Serchhip District-ah TrueNat Laboratory atangin Sample 49 enfiah niin Rapid Antigen Test hmangin Sample 78 enfiah a ni bawk a, hri kai hmuh thar erawh an awmlo thung a ni.