Chanchin thar thenkhat :

Lunglei in Vaimin thar tam

Lunglei District chhunga loneitute chuan kumin hian Vaimin quintal 700 chuang an thar tawh. Lunglei District Agriculture Officer, Tlangti-mawia chuan tun dinhmun ah Lunglei District chu kumin chhunga Mizoram District pum huapa Vaimim thar tam ber an ni tih hi sawiin, tun thlengin Vaimim quintal 700.55 an thar tawh tih a sawi a, Vaimin tharchhuah hi Lunglei High Powered Committee kaltlangin Agriculture Department ten a hmunah an khawl-a nuai sakin an leisak zel tih a sawi bawk. Heng Vaimin an leikhawm hi AH&Vety Department chuan Ar chaw-ah an siam dawn a, a bawlhhlo hrang hrang phai atangin chah thleng tawh mah se a herna tur khawl tak erawh chah thlen ala nih loh avangin Ar Chaw erawh siam theih ala nilo thung.

Ramri hnaih ah Thlam kang

Mizoram leh Assam ramri hnaiha buaina a awm mek laiin Inrinni zan dar 7:40 vel khan Phai-nuam khaw bul lawka R. Lalhmingliana leilet Thlam, hnamdang (Somir) luah lai chu mi tu tih hriat loh ten halin bungrua engmah chuh hmanloh in a kangral vek a, Vairengte leh ramri buaina avanga Vairengte-a cham mek MZP General Hqrs. hruai-tute chuan helai hmun hi tlawh nghalin, tunhnaia ramri-a buaina thleng mek avangin he thil thleng hi pawikhawihna lian tak a nih bakah, Assam lam misual sulhnu a nih theih avangin Vairengte Police Station-ah FIR an thehlut nghal a ni. He Thlam kang-ah hian bungrua bakah Power Tiller a kangral a ni.

Mamit DC sawnchhuah phut

Inrinni kaltaa Mamit DC leh Karimganj DC ten Isabeel Tea Estate-a inbiakna an neih chung-changah nimin khan Mamit Sub-Hqrs. YMA chuan thutkhawm hmanhmawh neiin Karimganj DC, Anbamuthan MP chu biak chhunzawm zel chi ah an ngailo tih an sawi a. He Meeting minute hi pawm chi ah an ngaihloh thu leh Mamit DC pawh sawnchhuaka DC thar a rang thei ang bera pe tura sawrkar an phut thu an sawi bawk.

Ramri-a duty te sum hlan

Aizawl South-II bialtu MLA, Lalchhuanthanga leh ZPM hruaitu thenkhat te chuan Inrinni khan Vairengte lama Assam leh Mizoram ramri tlawhin ramri-a duty te hnenah Mizoram himna atana an tha thawhah lawmthu sawi nan Vairengte Joint VC leh Saihapui ‘V’ VC te hnenah Rs. 5000/- ve ve bakah ZDU hnenah Rs. 5000/- an hlan bawk.

Truck tirh belh zel a ni

Mizoram chak lakna kawngpui Assam-ah danpin a nih avanga Manipur atanga Mizoram mamawh eirawngbawlna Gas phur tur Truck te Zirtawpni-a thlahliam an nih hnuah Inrinni khan tuialhthei phur tur Truck 5 chu Aizawl atangin thlahliam leh an ni a, hetihlai hian Tripura lam panna kawng pawh thuamthat mek a ni.