‘COVID-19 No Tolerance Drive’ hman a ni dawn

October 26, 2020 atanga 'COVID -19 No Tolerance Fortnight' hman chu tukin dar 4:30 hian a tawp dawn ta a, amaherawh chu Mizoram sawrkar chuan tun thla ni 30 thleng 'COVID-19 No Tolerance Drive' hmang zui tura ruahmanna siamin hemi atan hian inkaihhruaina thar pawh tihchhuah nghal a ni.

'COVID-19 No Tolerance Drive' tur atana inkaihhruaina thar siamah hian thil danglam lutuk awmlo mah se inkaih-hruaina thenkhat thlahdul hlek a awm bawk a, Mizoram luhchhuahna, Inter-State Border hawn mek kawngpui te chu hawn chhunzawm tur niin Lengpui Airport pawh hawn chhunzawm a ni anga, Mizoram-a lut turte reng reng chu Entry Point-ah uluk taka Screening kalpui chhunzawmin inkhunghranna kalpui mek pawh chhunzawm a ni bawk ang.

Sawrkar Office leh Office dang kai dan chungchangah Office kaina atanga hri darh thei venna atan Administrative Head/Head of Department/Head of Office tin ten thawktute an kal dan tur ruahmanin, COVID-19 Executive Duty tura ruat tawh te erawh chuan Deputy Commissioner te ruahman angin an thawk chhunzawm anga, Office dawr tur reng rengin appointment lak hmasak tur a ni ang.

Mipui vantlang khuahkhirhna ah District Hqrs. ah te chuan zan dar 8:00 atanga zing dar 4:30 inkarah pawnchhuah khap tlat a ni leh dawn a, phalna nei lova vantlang hmuna mi 5 (panga) aia tam awmkhawm khap a ni bawk ang. School, College, Educational Coaching Institute leh Training Institute te chu thu leh awm hma chu khar chhunzawm tur a ni anga, Online hmanga zirtirna kalpui phal niin Zirtirtute rawn tura School-a kal chu khap rih a ni a, Sakhaw biakna hmunah mipui punkhawmna huaihawt phal a ni lova, Biak In-a zing tawngtai erawh mi 25 aia tamlo tan neih phal a ni.

Mipui ten a hmuna an en theih tur Games & Sports Tournament huaihawt phal a ni lova, entu mipui punkhawmna tello Games & Sports practice erawh phal niin Indoor-ah mi 10 aia tam leh pawnah mi 25 aia tam punkhawm khap a ni a. Cinema Hall, Auditorium, Community Hall, Picnic Spot, Swimming pool leh hetiang intawl-lenna hmunte chu khar chhunzawm tur a ni. Mitthi vuina leh inneihna (man hlan, inneih inkhawm leh reception)-ah te mi 35 aia tam punkhawm khap a ni bawk.

Dawr leh sumdawnna hmun kaihhruaina siam ah Bazar, Dawr, Petrol Pump/Filling Station leh sumdawnna hmuna 'Social Distancing' kenkawh tur niin dawr neitu leh a dawrtu ten Face Mask emaw, hmanraw dang hmangin hmai tuam ngei tur a ni a, dawrtute hming pawh chhin-chhiah vek tur niin Dawr zawng zawng chu (damdawi dawr tiam lovin) tlai dar 5:00 hmain khar vek tur a ni bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn