District pahnih DC te inbiakna chungchangah Chief Secretary in mipuite hnenah ngenna a siam

Mizoram Chief Secretary, Lalnunmawia Chuaungo chuan Mizoram mipuite chu Mizoram leh mipuite thatna duh vek kan ni tih sawiin, hemi kawnga hmalak kan duhdan erawh a inang vek kher lo a nih pawhin kan duhdan ang diak diaka ti lo te ram leh hnam hmelma ang dawn dawna inpuh chu tilo turin a ngen.

Chief Secretary chuan Mamit DC leh Karimganj DC ten Inrinni kalta a inbiakna an neih chungchangah thudik tawk lo Social Media hrang hranga thehdarh a awm tih sawiin, “October 29, 2020-a Union Home Secretary kaihhruaina a Video Conference hmanga Mizoram leh Assam Chief Secretary te meeting-ah Assam lam atanga Senior Official lokalin ramri chungchanga buaina hmuna kan mi leh sa te an rawn ankhum thin hi ti tawh suh se ti-a ka rawtna dungzuiin DC te hriatpuina lo chuan buaina hmun te hi tlawh tawh loh ni se tih leh, boruak tha zawk a awm theih nan DC Level-ah Meeting neih thin ni rawh se ti-a thu dah a ni,” a ti a. He thu dah dungzuiin Cachar leh Karimganj DC ten Kolasib leh Mamit DC te hnenah Meeting nei tura rawtna rawn siamin, Meeting neihpui turin DC te hi Phone-in instruction a pek thu a sawi.

Mamit DC hian Karimganj DC in Agenda a rawn rawt te chu tha a tih loh avangin Meeting neihpui loh mai a duh tih Chief Secretary chuan sawiin, amaherawh chu a duh ang ang Agenda siam ve tur leh Meeting neihpui tura a hrilh avangin he Meeting hi neih a nih thu leh Boundary leh Mizoram Police dahsawn chungchang chu DC Level-a sawifel chi a nihloh avanga sawipui a tulloh thu te, Meeting-ah hian inremna an nei theilo a nih pawhin a tangkai tho thu te a hrilh tih a sawi a, Meeting hmasa Mamit DC rawtna anga Kanhmun-a neih a nih tawh avangin Assam awp lama Meeting neih a pawi loh thu pawh a hrilh thu sawiin, DC pahnihte Meeting hi a ruka tih ni lovin dan pangngaia Official Channel zawm thlapa neih a nih thu leh Kolasib DC pawh buaina an siamna hmun ber, Lailapur-ah ngei meeting neihpui turin a tih thu a sawi bawk.

Chief Secretary chuan Mizoram leh mipuite thatna duh vek kan ni tih sawiin, hemi kawnga hmalak kan duhdan erawh a inang vek kher lovang tih a sawi a. Kan duhdan ang diak diaka ti lo te ram leh hnam hmelma ang dawn dawna inpuh lo tura ngenin, “Ramri buaina hi awlsam taka tihfel mai theih a ni lo tih kan hre tlang vek a, Assam sawrkar hian kan duh ang ang hi awlsam takin an ti zung zung bik dawn lo tih pawh kan hre ngei ang. Thinghlun leh Vairengte-a Police awm te hnukkir vat tura Mizoram sawrkar an karna hmanrua, Lailapura kawngpui dan hi kan hmachhawn a ni tih kan rilru-ah awm se. Dawhthei taka sawrkar hmalakna ngaichang tur leh rawtna kan neih te sawrkara thlen thin turin ka ngen a che u,” a ti a. Mizoram sawrkar in Assam chhunga kawngpui khar te hawn vat nan leh mipuite tan harsatna nasa lutuk a thlen loh nan hma a la reng tih pawh sawiin, hmalakna zawng zawng a tlangau pui reng loh avangin chiai lo turin mipuite a ngen bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn