Mamit DC leh Karimganj DC ten inbiakna neiin an inbiakna chungchang Mamit DC in a sawifiah

Mamit District Bawrhsap, Dr. Lalrozama chuan Karimganj DC nen Inrinni kalta an inbiaknaah Mizoram in a ram chinah sipai a dah a, a hnukkir thei lo tia a sawi thu leh hemi chungchang hi sawifel mai theih thil a nih loh avangin he an inbiaknaah an sawi zui lo tih a sawi.

Inrinni khan Mamit DC, Dr. Lalrozama IAS leh Karimganj DC, Anbamuthan MP, IAS te chuan Ischabeel Tea Estate, Karimganj-ah ramri-a buaina chungchang sawia inbiakna neiin boruak tha a awm theih nan hmalak tha an ti a. He inbiakna a tel District pahnih Bawrhsap te hian ramri-a remna leh muanna a awm theihna turin thawhhona tha tak nei chungin hmalakna kalpui nise an ti a. State pahnihte hian anmahni huamchhung ve ve ah buaina a awm lohna turin hmala se an ti. Mamit leh Karimganj thuneitute hian Motor veivak te pangngai taka an kal leh theihna turin leh a bik takin nitin mamawh phurtute chu khawi lam ve ve atang pawha dodalna awm lova an kaltlang theihnan enpuia hmalak nise an ti bawk.

Hemi hnu nimin khan Mamit District Bawrhsap hian ramri chungchang sawi a Mamit-a thutkhawm an neih ah an inbiakna chungchang hi sawiin, Karimganj DC nen an inbiakna chu mamawh phurluh chungchang leh ramri-a remna leh muanna chungchang a nih thu a sawi a. He an inbiakna ah hian Karimganj DC in agenda turin ramri buaina chungchang bawk sawi chhuakin, an ram china Mizoram in sipai a dah hnukkir tura a tih thu a sawi a, amaherawh chu October ni 9-a Assam Official ten Mizoram chhung an rawn beih avang sipai dah an nih thu leh Mizoram chhungah sipai dah an nih avangin hnuhkir an nih loh tur thuin a chhang tih a sawi a, Karimganj DC rawtna chu Agenda pawh nilo, sawi zui zel tullo a nih avangin sipai hnuhlet chungchang sawi theih a ni lo tiin an sawi zui ta lo niin a sawi bawk.

Mamit DC chuan Meeting minute atanga thlira ngawih bopui vek anga ngaihna mi tam takin an lo nei chu thil kal hmang a ni tih sawiin, agenda an sawiho an sawifiahna mai a nih thu leh pawmpuina pakhatmah a awm lova, an hnial vek zawk tih a sawi a, ram leh hnam chhan nan a takin an thawk a, tlanchhe mai chi an nilo tih a sawi bawk.