DC pahnih te inbiakna Meeting minute zirlai ten an hal

Mizo Zirlai Pawl (MZP) chuan Inrinni kalta a Mamit DC leh Karimganj DC te inbiakna Meeting minute chu nimin khan Aizawl Vanapa Hall kawt-ah an hal.

He Meeting Minute halna hunah hian MZP General Hqrs. President, B. Vanlal-tana chuan kan ram leh hnam humhim a nihna turin a tul huna chet chhuah mai chu kan tih tur a ni tih sawiin, “Ramri a buaina kan tawh chhoh mek lai leh kan ram kan chan lohna tura Mizo mipuite lungrual taka kan thawhho mek laiin Mamit DC in mipuite duhdan zahlo leh kan hnam tana pawi thei tura Karimganj DC inbiakna a neihpui hi MZP chuan thinurthlak a ti hle,” a ti a. Karimganj DC chu Mizote Thlam hal saktu leh thlai min suat sak tura thupetu a nih bakah, Mizo mipuite tan harsatna min siamsak chhunzawm tih sawiin, “Inbiakna neihpui tawh lo turin kan ngen tawh pawh zahlo a inbiakna a awm leh hi MZP chuan a pawm thei lo a ni,” a ti.

MZP President chuan sawrkar official te chu an service aiin kan ram leh hnam himna ngai pawimawh se an duh tih pawh sawiin, “Mizo an nihna anga he ram neitu an nihna hi hre thar leh se la, Nationalism-ah chiang thar leh se kan duh a. Vawiin-a kan thil tih pawh hian kan Official te ah nghawng tha zawk nei sela, ram leh hnam himna ngai pawimawh lo a che chhuak Mamit DC hi kan sawrkar hian a rang thei ang berin sawn rawh se,” a ti bawk.

Mizo Students' Union (MSU) General Hqrs. pawhin DC pahnih te inbiakna Minute hi nimin khan Chief Minister Bangla kawt-ah an hal bawk a, he hunah hian MSU Vice President, J. Lalmuanzuala chuan Mamit DC leh SP ten Zoram mipuite duh dan ni lo leh remti lo chunga Karimganj DC meeting a zuk neihpui chu an dem thu a sawi a, Mamit DC leh SP te chu darkar 24 chhunga sawnchhuah an phut thu a sawi bawk.