Nizan hmasa atangin MZP ten Buhchangphai-ah Phaisen-Dholchhora kawng an dang ve leh

Mizo Zirlai Pawl (MZP) Hqrs. Kolasib chuan nizan hmasa dar 9:00 atang khan Phaisen-Dholchhora kawng chu Buhchangphai-ah motor lut chhuak tur an dang.

Hemi chungchanga nimin a thuchhuah an siamah MZP Hqrs. Kolasib chuan nizan hmasa dar 9:00 atang khan MZP Hqrs. Kolasib leh a hnuaia Sub-Hqrs. te chuan Buhchangphai-ah lirthei lut chhuak tur an dan thu hi tarlangin, Assam miten Mizoram min nek avanga ramri buai kan nei fo chu pawi an tih thu leh, tunhnai bika kan buaina ah thisen a luang ta hial tih tarlangin, heng Assam-a awm, Bangladesh atanga dan lova rawn pem ten ram min chuhpui avanga buaina kalzelah Mizo te min hrek tumin, kan chak lakluhna ber Assam nena kan inkalpawhna kawng zawng zawng an dang (block) chu hriatthiam har an tih thu leh Phaisen-Dholchhora Road phei chu kawngpui tha lai an laichat a, chu pawh duhtawk lovin kawngpui an ping tih an tarlang a.

Tun tum buaina avanga Mizoram chhunga mipuite tanrualna ah lawmthu sawiin, hetiang buaina kan tawh fo avang hian MZP chuan Tripura leh Manipur atanga kan mamawh lakluh a nih theihnan Mizoram sawrkarah an lo thlen tawh thin thu leh an thu thlente ngai pawimawha Manipur atanga Oil leh Gas lakluh a ni mek te, Tripura lam panna kawng cheithat a ni mekte chu lawmawm an tih thu sawiin, amaherawhchu Mizo driver leh Mizote bungraw phurtu Truck thahnem tak mai Silchar-ah an la tangkhang erawh an rilru-ah an awm reng thu leh, heng mite hi dam leh him taka lachhuak turin Mizoram sawrkar pawh an ngen thu an sawi.

MZP Hqrs. Kolasib chuan kan mamawh lakluh phal lova min hrek mektu vai te chu an sum hmuhna chu keini Mizo te kan nih thu leh, kan mamawh ang chiahin anni pawhin min mamawh a ni tih mipuiten hre thar se tih pawh sawiin, hetih mek lai hian Mizo sumdawng thenkhat ten Phaisen-Dholchhora kaltlanga Sangha inbanlek an lo tum chu pawi an tih thu an sawi a, “Kan Mizo driver te him taka Mizoram an rawn luh hma chuan min hrektu vai ho nena lo insumdawntawn hi MZP Kolasib Hqrs chuan a remti lo a ni,” an ti a. Tunah hian Mizo ten kan thenfai ngai miah lovin Phaisen - Dholchhora kawng pawh an rawn thianfai tawh tih pawh sawiin, tuna kan buaina chu an tel lovin kan awm thei a ni tih lantirna hun remchang a ni tih an sawi a. Keini aia tlawm hmasa zawk tur an nih tih hre chungin hun reilo te chhung chu dawh thei taka nghak hram hram tura ngenin, Mizo leh Mizo in dan buai ngai lo turin Phaisen kawng lama kal rihlo turin an ngen bawk a ni.