Commerce & Industries Minister hovin ramri-a insumdawntawnna chungchang sawiho a ni

Nimin khan Commerce & Industries Minister, Dr. R. Lalthangliana hovin Myanmar leh Bangladesh ramri-a insumdawntawnna (Border Trade) tih hmasawn dan tur leh hmalakna kal mekte chungchang sawiho a ni a, he thutkhawm ah hian Minister chuan International Border hrula sumdawnna atana pawimawh te thuamthat-a siamthat zel a nih tur thu a sawi.

SAD Conference Hall-a he thutkhawm ah hian Commerce & Industries Minister, Dr. R. Lalthangliana chuan ram a thang zel a, ram leh ram insumdawntawnna (International Trade/Border Trade) chu sawrkar laipuiin a ngai pawimawh chho zel a, Mizoram pawhin theihtawpin tan a la ve zel a ni, a ti a. Tunah hian Mizoram-in ramri-a sumdawnna hmun (Trade Centre) atana a hman thenkhatte hi tunhma atang tawhin sumdawnna a kal rengna hmun a ni a, ram leh ram inhriatpuinaa sumdawnna a kal theih chuan awlsam leh tha zawkin sumdawnna kalpui thei ang a, ram pawhin hma a sawn thei dawn a ni, a ti bawk.

Mizoram-in ramri-a sumdawnna a kalpui mek leh nasa lehzuala kalpui a tumna hmun heng - Land Custom Station, Zokhawthar; Integrated Check Post, Kawrpuichhuah; Land Custom Station, Zorinpui leh Trade Centre (LCS/ILP), Saisihchhuah-ah sawrkar laipui tanpuina in chak taka hmalak zel a ni a. Myanmar leh India sawrkar ten MoU an ziah angin Border Haat hmanga sumdawna atan sawrkarin heng - Hnahlan, Zote, Vaphai (Saikhumphai) leh Pangkhua-ah te Haat sakna turin ram a nei tawh a, Land Lease pawh tihfel mek niin, Border Haat sakna tur hian sawrkar laipui ruahmanna angin Haat pakhatah cheng nuai 50 ruahman a ni a, sum dilna pawh thehluh tawh a ni. Myanmar ram nena inkalpawhna tur Lei (bridge) dawhna hmun tur pawh Central-ah thehluh a ni tawh bawk.

Bangladesh nena Border Haat hmanga insumdawntawn theih nan Mizoram chuan hmun a nei tha a, Marpara, Silsury, Tuipuibari leh Nunsury ah te Haat siamna tur sawrkar laipui-a Ministry of Commerce hnenah thlen a ni tawh bawk.

Heng Border Trade leh Border Haat hmun te hi hun remchang hmasa berah Joint Inspection neih a that a rin thu Minister hian sawiin, kumin chu COVID-19 avangin sawrkarin Commerce & Industries hnuaiah duh anga chakin hma a la thei lo chu pawi a tih thu a sawi bawk.

Mizoram hian Myanmar nen ramri KM 404 neiin Bangladesh nen KM 308 a nei a ni.