Mizoram-ah hri kai mi 61 hmuh belh leh an ni

Niminpiah khan Mizoram-ah COVID-19 hri kai mi 61 hmuh belh leh an ni a, tun thlenga hri kai hmuhchhuah chu 3217 an tling tawh.

Niminpiah khan ZMC Laboratory-ah Sample 659 enfiah niin heng atang hian COVID-19 hri kai mi 44 hmuhchhuah niin an vai hian Aizawl District-a Sample lak vek an ni a, Aizawl Dinthar Veng-ah hri kai mi 16 zet hmuhchhuah niin hri kai hmuhchhuah tawh te nen chhungkhat hnaivai deuh vek an ni a, Chhinga Veng-ah hri kai mi 9 hmuh niin hei pawh hi chhungte hri kai hmuh tawh deuh vek an ni bawk.

Hei bakah hian Zarkawt leh Khatla South-ah hri kai mi 2 ve ve hmuh niin Chanmari, Chanmari West, Zemabawk leh Armed Veng atangin hri kai pakhat theuh hmuh a ni bawk. Hei bakah hian Seling-ah hri kai mi 4 hmuh an ni a, Bung Bangla Quarantine Facility atangin hri kai mi 5 hmuh niin State pawn atanga rawn lut mi 3 leh anmahni enkawltu mi 2 an ni a, BRO Quarantine Facility atangin State pawn atanga rawn lut hri kai pakhat hmuh a ni bawk.

Niminpiah khan District hrang hranga TrueNat Laboratory-ah Sample 50 enfiah niin hri kai mi pakhat hmuh a ni a, Hnahthial District-a hri kai hmuhchhuah niin ABCI hnuaia thawk tura State pawn atanga rawn lut a ni bawk. Rapid Antigen Test hmangin niminpiah khan Mizoram-ah Sample 703 enfiah niin hri kai 16 hmuh an ni bawk a, Lawngtlai Council Dinthar Veng ami te vek niin hri kai tawh te nen inkawmhnaih atanga hri kaichhawng niin an zingah hian VLTF Member mi 3 an tel bawk a ni.

Heti hian nimin thleng khan Mizoram-ah COVID-19 hri kai hmuhchhuah chu mi 3217 an tling ta a, an zinga mi 2688 te chu enkawl dam ni tawhin tunah hian hri kai enkawllai 527 an awm a, hri kai zingah nunna chan mi pahnih an awm tawh bawk a ni.

Hri kai enkawllai nuai 5 aiin an tlem ta :

India rama COVID-19 hri kai enkawllai chu mi nuai 5 aiin an tlem ve leh ta ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample 11,53,294 enfiah leh niin heng atang hian hri kai mi 44,281 hmuh belh leh an ni a, heti hian nimin thlenga India rama hri kai hmuhchhuah chu 86,36,011 an tling ta a ni. Darkar 24 kalta chhung khan hri kai mi 50,326 te chu enkawl dam leh niin tun thlenga hri kai enkawl dam chu 80,13,783 an tling ta a, hei hi hri kai hmuhchhuah atanga chhutin za zela 92.79 a ni.

Tunah hian India ramah hri kai enkawllai 4,94,657 awmin hei hi hri kai hmuhchhuah atangin zaa 5.73 a ni a, darkar 24 kalta chhungin nunna chan mi 512 awm lehin tun thlenga hri kai zinga nunna chan chu 1,27,571 an ni ta a, hei hi hri kai hmuhchhuah atangin zaa 1.48 a ni bawk.