Serchhip-a thlai thar hralhna man tur ruahman a ni

Serchhip-a Divisional Horticulture Officer, M. Vanlalzami hovin nimin khan Serchhip a thlai chingtu, Horticulture & Agriculture Farming Co-operative Society Serchhip te chuan Serchhip atanga thlai tharchhuah hralhchhuahna tur man chungchang an sawiho.

He sawihona Serchhip DHO Pisa-a neih ah hian DHO, M. Vanlalzami chuan tun thla ni 7 khan Aizawl-a Commerce & Industries Department Director kaihhruaina hnuaia thutkhawm neih-ah Serchhip District-a thlai tharchhuahte Aizawl-ah mumal zawka hralh dan tur sawihona bawhzuiin he thutkhawm hi neih a nih thu a sawi a. Serchhip DHO chuan tunhnaia Aizawl-a thlai thar man sang lutuk chu a thartu lam mawh ni lovin a kharchhawngtu zawk nia lan avangin hei hi Society hotute nen tangho-a man tlawm zawka thlai tharchhuah hralhchhuah a nih theih dan tur leh an inhuam dan a zira hmalakna hi kalpui tur a nih thu a sawi bawk.

He Meeting-ah hian Serchhip-a thlai hralhna tur man hrang hrang bithliah niin Bawkbawn chu a chinna hmunah Kg. khat zelah Rs. 20/- atanga Rs. 25/- a ni anga, Aizawl-ah Rs. 35/- a ni ang. Antam chu a hmunah Tel khat zelah Rs. 40 atanga Rs. 50/- niin Aizawl-ah Rs. 60/- a pek a ni anga, hei bakah hian North Vanlaiphai atangin Hmarcha chu kg. khat Rs. 70/- a pek a ni anga, thlai thar lei leh thawn hna hi Department leh Society tangkawp te buaipui tur niin mawh-phurtu tur te ruat nghal an ni bawk.