Chanchin thar thenkhat :

 MNF in ramri hralh dan tur pawh an hrelo tih sawi

MNF Party chuan ramri hralh chu sawi loh, a hralh dan tur ringawt pawh an hre lo tih an sawi. Nimin-a thuchhuah an siamah MNF Party chuan ZPM hotupa, Lalduhawma MLA chuan, MNF party chu Assam-a BJP an sawrkar nawn theihna tura ramri hralh ta hiala an ngaih thu niminpiah khan Media mite hmaah a sawi tih sawiin, “Dawt sawi thang, mam taka engkim sawi thin Pu Duhawma hian, ram hruai tuma a zinkawng ti awihawm fo thintu atana a hmanraw pui ber, dawt pawh a sawi rinawm thiam ta lo,” an ti a. “Hetiang zawnga sawrkar puh hmingchhiat a duh rau rau chuan, awihawm deuh zawk thildang phuahchhuah tur ngaihtuah nachang hria se a tha zawk tur,” an ti a. Ramri hralh chu sawi loh, a hralh dan tur ringawt pawh MNF chuan a hre lo tih hi tun chinah chuan lo hre tawh tura an hriattir thu pawh sawiin, Political party-te leh mimal tumahin ramri hralh lam hawiin thu an la sawi ngai lo a, ngaihtuah pawh an ngaihtuah chhin ngamin a rinawm loh tih an sawi bawk.


LADC sawrkar Dan ang thlapa din tih sawi

BJP Mizoram Pradesh Vice President, JB. Rualchhinga chuan LADC-a BJP sawrkar lai chu Dan ang thlapa din a nih thu a sawi. Nimin a Aizawl Press Club-a thuthar thehdarhtute a kawmna ah BJP Vice President chuan MNF party sawrkar, Zoramthanga kaihhruai in an Sawrkar phat atangin ADC pathum a Sawrkar te chu MNF party a an inleh loh chuan Dissolve leh tih theihna chikimin a vau nia sawiin, CADC-ah phei chuan sawrkarna an chhuahsak niin a sawi a. Hetiang hian LADC leh MADC-ah pawh tih tumin MADC-a Congress sawrkar chu kum 2019 ah BJP-ah an inleh phah thu leh LADC-ah pawh MDC 4 te chu Election-a anmahni Sponsor-tu Party, Congress Party atangin an ban phah niin an sawi a, CEM leh a hote ning lutuk chuan MADC ang thovin BJP an zawm phah ta niin an sawi bawk.


Mizoram chet dan Dan hnuaia chetna niin ngai

Peoples' Conference Party President, Lalhmangaiha Sailo chuan Mizoram leh Assam ramri-a harsatna lo thleng leh a kaihhnawih a Mizoram sawrkar hmalakna chu Dan hnuaia mahni huangchhung ngeia dik taka chetna a ni, a ti. Nimin a thuchhuah a siamah PC Party President chuan Mizoram sawrkarin buai punlun tur dan nan te, ram leh mipuite venhim nante a Police ralthuam keng, buaina hmuna a zuk dah chu mahni ramchhung ngeia dik taka hmalakna a ni tih sawiin, kan ram chhunga heti taka pawng-pawrh a Cachar, Hailakandi leh Karimganj District-a hotute chet dan hian min cho hle a ni tih a hmuh theih tih a sawi a. Kan ram leh State rorelna ah te pawh rawn inrawlh-a vengtu Police awmte la chhuak tura ngenna an han siam zui zel phei chu an thuneihna piahlam a nih thu a sawi bawk.


Tanpuina pek uar turin ngen

Mizoram Pradesh Congress Committee (MPCC) chuan AMC area-ah COVID-19 nasa taka a darh mek avanga lockdown puan chu sawisel theih ni lo mah se, hemi avanga harsatna tawkte khaichhuahna tur ruahmanna MNF sawrkarin engmah a nei lo chu an dem thu an sawi a. Hei vang hian tanpuina pek kawngah mipui kan harh thar leh a ngai tih sawiin, mirethei zawkte tanpuina lamah nasa zawka ke pen turin mipui an ngen bawk.


Mizo lal damrei ber boral

Mizo lal zinga damrei ber nia hriat Dungtlang khaw lal, Upa Vanpianga chu nimin chawhma dar 11:30 khan an chenna, Tahan Satrawm Veng-ah a boral. Upa Vanpianga hian kum 1949-1954 thleng khan Dungtlang-ah ro a rel a, rambuai avangin Myanmar/Burma-ah chho in, a boral thleng hian Tahan-ah hian a cheng zui ta a ni. Upa Vanpianga pa, Lianbura hi sipai a nih avangin a pa aiawhin kum tling lovin, naupangte in a lal a, a Upa ten ro a rel sak thung a ni. Kum 82-a upa Dungtlang lal, Vanpianga hi kum 2019 khan Dungtlang-a Chap-char Kut-ah Kut Thlengtu niin, hemi tum hian Dungtlang-a Sangsarih Mual-ah a damlai lung phunin, hei hi a khua leh tui a tlawh hnuhnun ber a ni ta bawk a, fa 12 neiin Tu 34 leh Tuchhuan 9 a nei bawk.


MBA in PIL Case File tum

Mizoram Bar Association chuan Vairengte dai-ah NH. 54 chu hun engemaw chen danpin a nih tawh thu leh hei vang hian ei leh bar lakluh kawngah Zoram mipui ten hun rei tak harsatna kan tawk tawh tih an sawi a. Hetianga NH. 54 danpin a nih reng hi Mizoram Bar Association chuan tha ti lovin Gauhati High Court Aizawl Bench-ah MBA hmingin PIL Case file nise an ti a, hemi atana mawhphur turin mi pali an inruat nghal bawk.


Saihapui 'V'-ah buhfai sem

Tunhnaia Mizoram leh Assam ramri buai avanga Saihapui 'V' mipui ten hna an thawh hleih theihloh avanga buhfai-a harsatna an tawh lohna turin nimin khan Supply Minister, K. Lalrinliana leh Serlui Bialtu MLA, Lalrinsanga Ralte te hmalakna in Saihapui 'V' a cheng chhungkaw tinte hnenah Buhfai Kg. 15 theuh sem an ni.


CM Relief Fund-ah sum hlan

Mizoram Governor, PS Sreedharan Pillai chuan October thla-a a hlawh atangin zaa 30, Rs.1,05,000/- chu hri leng dona atan Chief Mi-nister's Relief Fund for COVID-19 ah a hlan a, hei bakah hian T.Vanlalhnaia, New Serchhip chuan Rs. 3,556/- a hlan leh bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn