Chanchin thar thenkhat :

 Kanhmun in kawng dangping

Kanhmun Village Council leh NGO hrang hrangte chuan thuchhuah siamin nimin atanga thuleh awm hma chu Medili Lei kaltlanga Assam atanga bungrua Mizoram-a lut tur dan an tum tih an tarlang. Kanhmun khawtlang hruaitute leh NGO te hian Assam atangin Vairengte, Saihapui ‘V’ leh Bairabi-ah bungrua a luh loh avang te, Assam Police in Kanhmun kaltlanga bungraw lut tur an duh hun huna an dan vang te, Thinghlun Thlam haltu leh thlai tichhetu tun thlenga man an la nih loh vang te leh Zolawma leh Ben David-a te tun thlenga zangnadawmna pek an la nih loh vangte in kawng hi dan an tum tih thuchhuahah hian an tarlang.

Kanhmun VC leh NGO te chuan Mizo bungraw phur lirthei khalhtu Assam a tang mekte him taka Mizoram an rawn thlen an phut bakah Medili leh Zolawma ram a Temporary IR post siam chu Batallion Out Post a siam an phut a, Kanhmun atanga Medili IR duty na hmun a current pek tur chu hna chak zawka kalpui an phut bakah Mizo-ram Map siamthat an duh thu an tarlang a ni.


Hlawh pek tlai chhan sawi

Hripui leng vanga sawrkar laipui atanga October thla ah sum hmuh a tlakhniam avangin sawrkar hnathawk ten tum danga hlawh an lak hun pangngai ah hlawh an la thei lo. Tunhnaia Social Media-a sawrkar hnathawk Group A leh B ten hlawh an la thei dawnlo nia thuthang chung-chang sawifiahin Finance Department Additonal Secretary, Ramchhuana chuan Sawrkar laipui leh RBI in hlawh lak zat tur a ruahman sa kal pelh a hlauhthawn avangin sawrkar hnathawk te a hunbi dik ah hlawh an pek theih dawn loh thu an sawi a. Hetihlai hian an hlawh lak tur zat diktak an lak tho tur thu leh ruahmanna siamin Group C leh Group D pek phawt an ni anga, November ni 10 hnuah Group A leh Group  B te pek leh tur anih thu a sawi bawk.


Hri leng dona thlirho a ni

Nimin khan Champhai-ah District Level Task Force on COVID-19 chu thukhawmin hri leng mek chungchanga an District dinhmun te an thlirho a. He huna tarlan a nih danin Champhai District-ah hian Covid Care Centre (CCC)-ah khum 34 leh Dedicated Covid Health Centre (DCHC) ah khum 42 awm theihna ruahman niin Champhai District Hospital-ah Ventilator 4 a awm mek a, ramri dep khuate hnenah fimkhur zel tura hrilhhriat nawn fo nise tih niin, Covid-19 vanga khua leh khua inthinhrikna awm theite enzuia thleng lo tura mipuite zirtir nasat nise tih a ni bawk. Hei bakah hian an District-a PHC hrang hrangah Rapid Antigen Test (RAT) tihna Test Kid 50 dang pekchhuah leh tum a nih thu pawh tarlan a ni bawk.


Ruihhlo kaihhnawih a man thi

Vairengte Excise & Narcotics Department te kuta awm Lailapur lam mi, Intyaz Ali (48) S/o K. Ali, Lailapur chu nimin khan Vairengte CHC ah a boral. Thudawn danin Intyaz Ali hi ruihhlo tawlhruk kaihhnawih ah tunhnai khan Vairengte Kawngthar Branch YMA te chuan manin END kutah an hlan a, Septicemia vanga thi a nih thu thuneitute chuan an sawi a ni.


HPC inthlan inpeih tawh

Hmar People’s Convention (HPC) Party a Thangliensung Hmar kaihhruai leh Lalrosiem kaihhruai ten HPC Party dik tak, ziding zawk nih inchuha Court-a thubuai an neih thuremna angin tun thla ni 5-a HPC party inthlanna neih tur atan inbuatsaihna peihfel thawkhat a ni ta a. HPC party inthlanna atan hian khaw 6-ah Vote thlakna tur buatsaih niin President chuh tura hming pelut mi 4 awmin pakhat hi a inhnukdawk leh a, he inthlanna neih turah hian Vote nei thei mi 302 an awm dawn a ni. He inthlanna neih turah hian hri leng laka himna tura inkaihhruaina siam chu tha taka zawm tura ruahman niin venhimna pawh uluk taka ruahman a ni bawk.


LADC Pisa kai tur dang

MNF District Hqrs. Lawngtlai-a MNF Thalai leh Women Front te chuan Lai Autonomous District Council (LADC) a Chief Executive Member, T. Zakunga kaihhruai chu LADC-a sawrkar-na siam thei tur khawpa MDC an neih loh avangin nimin khan Office kai chhunzawm thei lovin an dang a, BJP MDC ten Majority pawh nei lova sawrkarna an la chelh reng chu hriatthiam harsa an tih thu an sawi. Hetihlai hian BJP Legislature Party Member, C. Lallungmuana chuan BJP Legislature Party in thlawptu a neih dan House-ah fiahna neih ala nih loh avangin nghet takin sawrkarna hi an kalpui thei niin a sawi thung a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn