Chanchin thar thenkhat :

 Faina endik dan tur thlirho

Mizoram Cleanliness Competition, 2020 a Panel Experts te hnathawh dan tur tlangpui in hrilhfiahna hun chu nimin khan UD&PA Department Director, H. Lianzela hovin UD&PA Direc-tor’s Meeting Room-ah neih a ni a, Mizoram Khawpui Fai Intihsiakna hi kumin October 2 khan kalpui tan niin Expert Panel te hian District hrang hranga khua 23 an tlawh ang a, tun thla ni 23 atangin endik hna hi thawk tura chhuak tan tura beisei an ni. Kumin a khawpui fai inelna neih turah hian tehfung atan Solid Waste Management, Information, Education & Communication, Community Participation, Public Feedback leh a dangte bakah, a hmasa ber atan Response to COVID-19 chu telh a ni.


Malaria dinhmun thlirho

Nimin khan Lunglei-ah Lunglei District Task Force for Malaria Elimination thutkhawm neih a ni a, he huna tarlan a nih danin Lunglei District hi Mizoram-ah Malaria vei tam lamah pahnihna niin Lunglei District-ah mihring 1,61,341 awmin District Hospital 1, Private Hospital 4, PHC 14, Main Centre 15, Health Sub-Centre 68 leh Khua 180 a awm a. Kum 2019 chhung khan Malaria vei mihring 1000 zelah 15 awmin, mitthi 3 an awm a, kumin ah 2020 October thla thlengin Malaria vei mihring 1000 zelah 16 awm in mitthi 1 a awm tawh bawk a ni. Kumin chhungin Lunglei District-ah damdawi a chiah sa Thosilen 89,111 sem a ni tawh bawk.


MLA in lawmpuina hlan

Champhai North bialtu MLA, Dr. ZR. Thiam-sanga chuan a bial chhung Ngaizawl khaw mi, tunhnai a Mizoram University-in Master Degree result hrang hrang a tihchhuah a Mizo Department atanga MA (Mizo) Gold Medalist, Thangsian-tluang S/o Khaikhatpiang chu a Office-ah lawm-puina hlanin Laptop a pe a. Dr. ZR. Thiamsanga chuan zirna chu ram leh hnam hmasawnna hnuk, eng hna pawh thawh nana pawimawh a nih a vangin kan hlamchhiah thei lo tih a sawi bawk.


PC in Argi. Minister an dem

PC Party thalaite chuan tunhnaiah Agriculture Minister-in sawrkar mi pawimawh tak tak te nen an thutkhawmna ah thlai thar kharchhawnga zuartute harsatna lam ngaihtuahpui miah lova, an thlai zawrh man tihsan chungchangah a demna thu a au chhuahpui ngawt chu nitin eichawp zawnga khawsa te a thamloh zia a tihlanna chiang takah an ngaih thu leh an dem thu nimin khan thuchhuah siamin an tarlang a. COVID-19 hripui karah thlai zuara eizawng ten an thlai zawrh man pangngai taka mipuite hnena an hralh theihna tura sawrkarin hmalakpuina leh ngaihsakna a neih lo avanga thlai man hi sang ta a ni tih hre turin Minister hi an chah bawk.


MZP in AR-ah an thlen

Aizawl-a awm 46 Assam Rifles, 23 Sector Assam Rifles te leh Mizoram-a NGO hrang hrangte chuan nimin khan Aizawl-a Assam Rifles hmunah inkawmna neiin he huna tel MZP hruaitute chuan Mizoram leh Assam ramri buai denchhena Lailapur misual thenkhatin National Highway an dan lai leh Mizo mipuiten harsatna kan tawh laia Assam Rifles ten Myanmar atanga kan mamawh bungrua lakluh tur an dang tlat chu an hriatthiam loh thu an sawi a, Assam Rifles ten Mizoram hmun hrang hrangah mipui chuanna motor an dap thin chuan mipui a ti thlabar tih pawh sawiin, an dap thin chhan te an zawt bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn