Assembly Speaker in Dan a bawhchhe lo - MNF Speaker chet dan MPCC in mak an tih thu an sawi

MNF General Hqrs. chuan thuchhuah siamin Assembly Speaker, Lalrinliana Sailo chuan Dan a bawhchhe lo niin an sawi.

Nimin-a thuchhuah an siamah MNF General Hqrs. chuan Mizoram Pradesh Congress Çommittee in Assembly Speaker, Lalrinliana Sailo chu LADC Election Campaign-ah Dan bawhchhia anga puhin MPCC Vigilance Department chuan State Election Commission hnenah an hek tih tarlangin, hetia an ti hi an hriatchian loh vang zawk a ni tih an tarlang a, “Speaker hian Dan bawhchhiatna a nei lo. Zochachhuah-a kal tur a kalkawnga LADC inthlan lo awm turah party mite a tlawh pah chauh zawk a ni,” an ti. MNF thuchhuah chuan MADC Election hnuhnung berah khan Congress MLA, khatih hun laia Speaker, Hiphei chu sawrkar (Speaker) motor kengin a campaign nia sawiin, Pilot (security)-te pawh a hruai tel thu leh tuman an sawisel lo tih an tarlang a. “Election Model Code of Conduct puan a nih hnu hian sawrkar Motor hi ken thiang a ni tawh lova, Pu Lalrinliana Sailo hi chuan ama Private Motor ngei a keng a. Pilot erawh hi chu khawi hmunah pawh kal se Security atan a ken hi VIP a nihna angin phalsak a ni zawk,” an ti a. “Congress-te hian Speaker hi vengtu (security) nei lovin kal se, eng tawhsual emaw pawh lo tawk palhin a nunna atana hlauhawm thei thil chhe ber pawh thleng se pawi tihna an nei loah MNF chuan a ngai a ni,” an ti bawk.

Hetihlai hian Mizoram Pradesh Congress Committee (MPCC) Media Department chuan nimin khan thuchhuah siamin Mizoram Legislative Assembly Speaker-in Nov. 17, 2020-a Zorinpui kaltlanga insumdawntawnna tur buatsaih mek a enna tura party mi leh sa tam tak a hruai chu mak an tih thu sawiin, Minister dangte hna chanpuala inrawlh lo a, ama hna chanpual hneh taka enkawl zawk turin Assembly Speaker chu an hriattir nawn leh tih an sawi a. Legislative Assembly Speaker-te chu party mi an nihna dahtha a, House chhunga rorelna lai taka kaihruaitu tur leh pawn lamah pawh party mi leh sa an nihna tilang lo a zahawm taka khawsa tura ngaih an nih laiin Assembly Speaker-in Lai Autonomous District Council inthlan lo awm tura Lawngtlai-a MNF Party hruaitute kokhawm-a a Campaign chu an hrethiam lo hle tih an sawi a. “Dik taka rorelna kengkawh tura beisei Assembly Speaker-in Election Model Code of Conduct Rules bawhchhia a, a campaign leh Cabinet Minister dangte chanpual zahderna nei map lova a inrawlh fo mai hi Speaker ni zel tlakah Congress Party chuan a ngai lova, Speaker zahawmna a tibawrhbang nasa hle ah a ngai a ni,” tiin a rang thei ang berin Speaker chu thlak ni rawh se tih chu an ngaihdan a nih thu an tarlang bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn