Aizawl khawpui-a hri kai hmuhchhuah tlahniam

Niminpiah-a Mizoram-a Sample enfiah ah COVID-19 hri kai mi 32 hmuhchhuah a ni a, tunhnaia Aizawl khawpui chhunga hri kai hmuhchhuah tam lutuk chu a ziaawm tan mekin Bihar inthlanna a Duty zingah hri kai hmuhchhuah an pun belh mek thung.

Niminpiah khan ZMC Laboratory-ah Sample 436 enfiah niin heng atang hian COVID-19 hri kai mi 2 hmuhchhuah an ni a, heng te hi Kulikawn (Ngaizel) mi leh Chan-mari ami te niin hri kai tawh te nen inkawmhnaih atanga hri kaichhawng an ni. Niminpiah vek khan District hrang hranga TrueNat Laboratory-ah Sample 118 enfiah niin COVID-19 hri kai 18 hmuhchhuah an ni bawk a, Kolasib District-ah hri kai 8 hmuhchhuah niin an vai hian Mizoram Police 1st IR Batallion mi vek an ni a, Serchhip District-ah hri kai mi 8 bawk hmuh niin Mizoram Police mi leh sa vek an ni a, Lawngtlai leh Saitual District atangin hri kai pakhat ve ve hmuh niin State pawn atanga tunhnaia rawn lut ve ve an ni bawk. Rapid Antigen Test hmangin niminpiah khan Sample 843 enfiah niin hri kai mi 12 hmuh an ni bawk a, Lawngtlai District-ah hri kai mi 7 hmuh niin an zinga 6 chu LADC inthlanna a Duty tura koh Sample enfiah sak niin midang pakhat hi hri kai nen lo inkawmhnaih atanga hri kaichhawng a ni a, midang 5 te hi Aizawl khawpui chhunga hri kai niin Dinthar Veng leh Durtlang Leitan-ah mi 2 ve ve leh Mizoram University, Tanhril-ah mi pakhat te niin an zinga pakhat hi hri a kaina hriat a ni lo thung.

Heti hian nimin thleng khan Mizoram-ah COVID-19 hri kai hmuhchhuah chu 3513 an tling ta a, heng zinga mi 3025 te chu enkawl dam ni tawhin tunah hian hri kai enkawllai 483 an la awm mek a, hri kai zingah nunna chan mi 5 an awm tawh a ni.

India ramah hri kai 45,576 hmuh belh leh an ni :

Darkar 24 kalta chhung khan India ramah COVID-19 hri kai 45,576 hmuhchhuah leh niin hri kai 48,493 enkawl dam an ni a, nunna chan 585 an awm bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 10,28,203 enfiah leh niin heng atang hian COVID-19 hri kai 45,576 hmuh leh an ni a, heng te nen hian tun thlengin India ramah Sample 12,85,08,389 enfiah ni tawhin hri kai 89,58,483 hmuh an ni tawh a, India rama Sample enfiah zawng zawng atangin zaa 6.97 te chuan hri an kai a ni.

Hetihlai hian darkar 24 kalta chhung khan India ramah COVID-19 hri kai 48,493 te chu enkawl dam leh niin heng te nen hian tun thlengin hri kai 83,83,602 enkawl dam an ni ta a, hei hi hri kai hmuhchhuah zawng zawng atanga chhutin zaa 93.58 niin hri kai enkawllai 4,43,303 an la awm mek a, hri kai hmuhchhuah atangin zaa 4.95 a ni bawk. Darkar 24 chhung khan India ramah hri kai 585 te chuan nunna chan lehin tun thlengin nunna chan 1,31,578 an awm tawh a, hei hi hri kai hmuhchhuah atangin zaa 1.47 a ni bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn