AMC huamchhunga inkharkhipna kalpui mek pawtsei leh turin rawtna siam a ni

Health Minister, Dr. R. Lalthangliana hova nimin-a sawrkar mi pawimawh te thukhawm chuan Aizawl Municipal Corporation Area a inkharkhip kalpui mek tukin dar 4:30-a tawp tur chu mipuite himna atan pawhsei tha an ti a. Chief Minister hnenah rawtna thlenin a remtih dan a zirin inkharkhip kalpui dan tur hi tihchhuah leh a ni ang.

SAD Conference Hall-a nimin-a thutkhawm ah hian hripui leng mek-a Mizoram dinhmun thlirho niin Integrated Disease Surveillance Programme (IDSP), H&FW Department report danin October kar hnuhnung ber (October 25 - 31) inkar khan Mizoram-ah sample 9781 enfiah a ni a. Heng atang hian COVID-19 hei kai mi 309 hmuhchhuah niin an zinga 121 (39.15%) hi natna langchhuak (symptomatic) an ni a, midang 188 (60.84%) chu natna langchhuak lo an ni thung. Hemi hun chhung hian AMC Area a Local Council 83 awm zinga 54 ah hri kai thar hmuhchhuah an ni. Tun thlenga Mizoram-a COVID-19 hri kai hmuh chhuah zinga 2128 (77.20%) hi mipa an ni a, 629 (22.81 %) hi hmeichhia an ni. COVID-19 hri kai hmuhchhuah tawh zawng zawng zinga 1654 hi zinchhuahna nei, State pawn atanga lo lut an ni a, mi 1103 hi Mizoram chhunga hri kai an ni. Hri kai hmuhchhuah tawh zawng zawng zinga 94.45 % hi Civil mi niin, Para-Military Forces leh Army hi 3 % niin, Frontline workers positive hi 2.54% an ni thung.

Contact Tracing Team report danin nimin, Nov. 2, 2020 zing thleng khan Mizoram pumah COVID-19 hri kai 2757 hmuhchhuah an ni a. Aizawl District-ah 1883, Lunglei District-ah 282, Siaha District-ah 32, Champhai District-ah 26, Kolasib District-ah 253, Serchhip District-ah 87, Lawngtlai District-ah 100, Mamit District-ah 59, Saitual District-ah 15, Khawzawl District-ah 7 leh Hnahthial District-ah 13 an ni a. Zaipawl hla zirna hmun pahnih a in kaichhawng mi 18 an awm a, Office kaihhnawih a hri kai 45 awmin, Zirna In hrang hrang kaihhnawih a hri kai 119 an awm bawk. Damdawi In leh a chhehvela hri kai hmuhchhuah 48 an awm a, tun thlenga Contact Tracing Team in hnu an chhuina a an contact tawh zawng zawng zat hi 25,596 a ni a, Contact Tracing tih ngai a pun zel avangin hri kaina hriat harsa zualte umzui tur Team thar din tum a ni bawk.

He Meeting-ah hian COVID-19 hri kai ni lo, natna dang nei Non-COVID patient te ngaih pawimawh a tul thu sawilan a ni a, Non-COVID patient te tan Emergency thila biak tur Helpline siam a tul thu leh, Sawrkar laipui thupek angin Health Sub-Centre leh Upper PHC te pawh hawn chhunzawm a tul dawn thu tarlan a ni.

Hei bakah hian COVID-19 hri kai zinga naupangte awmna tur bik, Child-Friendly COVID Care Centre atan Bal Bhavan, ITI chu buatsaih mek a nih thu leh reilote ah naupangte awmna tura peihfel a nih tur thu tarlan a ni.

Nimin-a thutkhawm ah hian heng Report hrang hrangte hi ngaihthlak niin Aizawl Municipal Corporation (AMC) Area a inkhar-khip kalpui mek tukin dar 4:30-a tawp tur chu tuna dinhmun uluk taka thlirin mipuite himna atan pawhsei tha an ti a, Chief Minister hnenah rawtna thlenin a remtih dan ang zawmin Mizo-ram State Disaster Management Authority a State Executive Committee Chairman in thupek a tichhuak leh dawn a ni.

Nimin-a thutkhawm ah hian sawrkar mi pawimawh te bakah NGO leh Doctor bakah Kohhran hruaitute aiawh pawh an tel a, Meeting hian Mizoram Kohhran Hruaitu Committee kaihhruaina in Television kaltlangin programme siam a that thu pawh he hunah hian sawi a ni a, he hunah hian Zoram mipui zawng zawng a ruala tawngtai nise, COVID-19 laka kan him theih nan leh ramri buai chungchang tha taka chinfel a nih theih nan tawngtai rualna hi neih nise tih a ni bawk.