Serchhip District-ah Dan zawmlo mi 563 man tawh

Kar kalta Thawhtanni atanga COVID-19 No Tolerance Fortnight hman a nih hnuah Serchhip District-ah Dan bawhchhia mi 563 man an ni tawh.

Mizoram-a COVID-19 hri leng mek chhutchah a nih theihna tura sawrkar in hri dona kawnga Dan a siam hrang hrangte ngaih-hnathiamna tel lova kenkawh hna chawlhkar hnih a kalpui tur hi kar kalta Thawhtanni atang khan Mizoram pumah kalpui a ni a, hemi ang hian Serchhip-ah pawh he Fortnight hi kalpuiin Police leh Veng hrang hranga VLTF te bakah sawrkar hnathawk Duty tura ruat, Executive Duty te chuan hri leng dona kawnga Dan siam te hi khawng taka kenkawh hna thawkin he Fortnight kalpui a nih atanga ni 7, nimin thleng khan The Mizoram (Containment and Prevention of Covid-19) Act 2020 zawmlo an man chu mi 563 an tling tawh a, heng mite pawisa chawi tlingkhawm hi Rs. 70,800/- a tling tawh a ni.

Serchhip-a he Dan kalpui tan ni, tunkar Thawhtanni khan Dan bawhchhia hi mi 63 man nghal niin a tuk, Thawhlehni khan mi 100 man leh an ni a, Nilaini-ah mi 119 manin Ningani-ah mi 103 man lehin Zirtawpni khan mi 56 man leh an ni bawk a, Inrinni khan dan bawhchhia mi 53 man leh an nih bakah nimin khan mi 69 man leh an ni bawk. Heng Dan zawmlo an man zingah hian vantlang hmuna hmai tuamna (face Mask) hmanloh avanga man an tam ber nia thudawn a ni a, Dan bawhchhia man te zingah hian Serchhip Town chhunga man tam berin mi 191 zet man an ni tawh a, Police te pawhin mi 183 zet an man tawh bawk a ni.