Aizawl Republic Veng-a chhungkaw pakhat-a mi 5 thattu damchhung tang tura tih a ni

Kum 2015 January ni 9-a Aizawl Republic Veng-a chhungkaw pakhat-a mi 5 thattu, Laltlanchhuaha chu Court in kum 24 leh damchhung tang turin a chungthu a rel sak.

Nimin khan Additional District & Session Judge, Aizawl Judicial District chuan kum 2015 January 9-a Aizawl Republic Veng-a Sangliansiama te chhungkua a mi 5 thattu, Laltlanchhuaha hremna pek tur hi puangin Court chuan Laltlanchhuaha hi tualthah tum-a mi In-a luh thubuai ah hrehawm taka kum 10 lung In tang tur leh cheng nuai 2 chawi tura tiin pawisa chawi tur hi a neilo a nih chuan kum 2 dang a tan belh leh anga, tualthah tumna thubuai ah hetiang bawk hian hrem a ni bawk a. He hremna hi kalkawp lovin kum 20 chhung lung In-a tang tur leh cheng nuai 4 chawi tura hrem niin hei hi a chawilo a nih chuan kum 4 a tan belh bawk ang.

Heng thubuai pahnih-a hremna, kum 24 chhung hrehawm taka a tan tlak hnuah mi 5 a thah avangin damchhung lung In tang tur leh mi pakhat thah ah cheng nuai 2 zel, a vaiin cheng nuai 10 chawi tura a chungthu rel a ni bawk a, pawisa chawi tur hi a neilo a nih chuan kum 10 a tan belh thei dawn bawk a ni. Court thuchhuah chuan ‘Damchhung lung In tan’ tih hian taksa damchhung tak tak lung In tan tur a nih thu tarlangin, Mizoram Victims of Crime Compensation Scheme, 2011 angin he thil thleng avanga mitthi te rokhawmtu mi 5 te chuan zangnadawmna a tlem berah cheng nuai 2 theuh tal dawng turin District Legal Services Authority, Aizawl chu a Dan kalphung anga hma la thupek a ni bawk.

January 9, 2015 zan dar 7:30 vel khan Laltlanchhuaha (37) s/o Parzuala Republic Veng chu Aizawl Republic Veng-a Spingfield School building neitu, Sangliansiama (57) te In-ah Sunrider product zuar anga lutin In neitute hian nidang-ah an lei sak thin avangin an leisak theilo tih an lo hrilh a. Amaherawh chu pawisa dil zuiin Rs.1000 pek a nih chu duhtawk loa a dil belh hlawhchham hnuah eirawngbawlna Gas bula In neitupa, Sangliansiama ding chu chemte in a vit zui ta mai nia thudawn a ni a, an awmpui hmeichhia chuan a Pu vittu hi namthluin a hlau thlabar chu Bathroom-ah a tlanzut zui a. Hetiang thil a thlen hnu hian Sangliansiama farnu an In-a cheng, Vanlalchhungi (54) hlau tlanchhuah tum chu Laltlanchhuaha hian hnuk lutin a vit zui a, kawngkapui chu chhung lamah kalh zuiin an chhungkaw nu ber, Khualthangi (SBI Serchhip Branch-a Manager hna pawh lo thawk tawh) Bedroom a tlanlut chu um zuiin, a vihhlum hnuah a farnu fa, Samuel Lalrinchhana (14) s/o Chalkunga leh an fapa neihchhun Isaac Lalrinnunga (5) chu a vit zui leh a, Issac Lalrinnunga tihloh hi a hmunah hian boral nghalin Issac-a hi damdawi In panpui a nih laiin a boral ve leh bawk a, Sangliansiama te chhungkaw member zing ami, Lalhriatpuia s/o Vanlalchhungi erawh chu hemi tlai hian hmundang ah zanriah a ei avanga a awm ve loh avangin a him hlauh a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn