Chief Minister in Lawngtlai District-a cheng nuai 12,044.20 senna tur a khuhhawng

Sports & Youth Services Department leh Mizoram State Sports Council (MSSC) ten Pradhan Mantri Jan Vikas Karyakram (PMJVK) hnuaia sum hmuh cheng nuai 12,044.20 senga Lawngtlai District-a hma an lakna tur Project 14 khuhhawnna chu nimin khan Chief Minister, Zoramthanga hova neih a ni.

Heng Project 14 khuhhawnna hun hi Video Conference-a CM Cabinet Meeting Room leh Lawngtlai DC Conference Hall thlunzawm a neih a ni a, he hunah hian Chief Minister, Zoramthanga chuan thalaite tana infiamna lama hmasawnna tur hmalakna thar pui tham tak bultan a ni chu lawmawm a tih thu sawiin, Sawrkar-in mipui hmasawnna tura hmalakna hrang hrang a siam te chu a nih ang tur taka puitlin tur chuan mipui tawiawmna leh thlawpna a pawimawh thu a sawi a. Mizoram chhimlam chu State hmasawnna atana prospect nei tha, Agriculture leh Horticulture lamah te, inkalpawhna kawng leh Waterway te leh thildang dangah a neih thu a sawi a. Tun tuma infiamna lama hmasawnna ruhrel din tur pawh Lawngtlai District leh Zoram pum tana chhawr tlak a nih thei a beisei thu a sawi bawk.

He hun hi Sports Department Secretary, H. Lalengmawia chuan kaihruaiin MSSC Secretary, John Tanpuia hnen atangin Technical Report ngaihthlak a ni a, Lawngtlai District-a Project lungphum chu Chief Minister aiawhin Lawngtlai DC chuan a phum sak bawk a ni.

Nimin-a lungphum phum tak te hi cheng nuai 5019.43 senna tur Lawngtlai District Sports Complex te; cheng nuai 3,461.70 senna tur Lawng-tlai Residential Sports School te, cheng nuai 282.80 senna tur Lawngtlai Govt. College Hostel sak te; cheng nuai 260 senna tur Lawngtlai Community Centre te; cheng nuai 1,005.34 senna tur Astro Turf Football Ground te; cheng nuai 542.6 senga Basketball Court 5 siamna tur te; cheng nuai 282.80 seng-a Chawngte-a Girls Hostel sakna tur te; cheng nuai 140 seng-a Bungtlang South Community Service Centre sakna tur te; cheng nuai 532.47 senga Chawngte Astro Turf Football Ground siamna tur te, Smart Class Room engemaw zat siamna tur leh IT Education hnuaia Central Sawrkar projects kaltlanga School-a Computer sem te a tel a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn