Chanchin thar thenkhat :

MYC hnuaiah kalpui tan

Mizoram Youth Commission chuan Mizo thalai lehkhathiam, Central Services-a tling kan awm ngei theihna turin ‘Mizoram Super 20 IAS Full Sponsorship Exam programme’ a kalpui tan ta a. He ruahmanna hnuaiah hian MYC chuan Mizo thalai lehkhathiam, Central Services-a tling thei tura thawkrim ngam mi 20 te chu New Delhi-a Coaching Academy tha-a inkulh turin a thlawnin a chawm dawn a ni. Chief Minister Zoramthanga chuan Sawrkarin thalai lehkha-thiamte hmakhua ngaia MYC kaltlanga Central Services-a Mizo thalai an tlin theihna tura programme ropui tak duan a ni chu Mizote tana mellung thar pawimawh tak a ni tih a sawi.


Lawngtlai-ah inkharkhip rel

Nimin khan Lawngtlai-ah District Level Task Force on COVID-19 (DLTF) chu thukhawmin tunhnaia Lawngtlai District-a vantlang zinga COVID-19 kai an pun zel avanga hmalak dan tur an rel a. He thutkhawm ah hian Political Party leh Central YLA aiawhte pawh sawm niin he huna sawihona an neih hnuah Lawngtlai District chhunga vantlang zinga hri inkai darh zel tur ven nan leh felfai taka hri kai te hnu chhui tih a nih theih nan tul lova mipui chetvelna khuahkhirh a pawimawh an ti a. Hemi atan hian Lawngtlai khawpui chhung leh District chhung khaw then-khat, vantlang zinga hri kai hmuhchhuahna ah te ni nga (5) chhung atan engemaw chin inkhuah-khirh (partial lockdown) nise an ti a ni. Thudawn danin Lawngtlai District-ah hian COVID-19 hri kai 161 hmuhchhuah an ni tawh a, heng zinga 105 te chu enkawl dam ni tawhin tunah hian hri kai enkawllai 56 an la awm mek a, Aizawl District tihloh District dang zinga hri kai enkawllai tamna ber an ni mek a ni.


Hnathawh dan tur zirho

Nimin khan Champhai-ah Mizoram Remote Sensing Application Centre (MIRSAC) buat-saihin FOCUS Project kaltlanga Champhai District hnuaia thawktute tan Geographic Information System (GIS) Data chungchang leh a hman dan inzirtirna neih a ni a, he hunah hian FOCUS hnuaia thawktute hi an hnathawhna atana hman tur Mobile Handset hlanin hemi hmanga an hnathawh dan tur zirtir nghal an ni bawk.


ZMC-ah ICU Khum 15 hlan

Supply Minister, K. Lalrinliana hmalakna a Mizoram sawrkar leh Indian Oil Corporation Limited (IOCL) ten August ni 3, 2020-a thawh-hona thuthlung (Memorandum of Understanding) an ziah bawhzuiin Indian Oil Corporation Limited chuan nimin khan Corporate Social Responsibility (CSR) Fund kaltlangin Mizoram-a COVID-19 dona atan Zoram Medical College (ZMC)-ah ICU khum 15 an hlan.


Hming pekluh hun tawp dawn

Thla thar December 4-a Lai Autonomous District Council (LADC) inthlanna neih tura chuh tumte tan Vawiin chawhma dar 11:00 atanga tlai dar 3:00 chhung hian Nomination Paper thehluhna hun hawn a ni dawn a, heng Nomination Paper thehluh te hi Vawiin tlai vek hian enfiah nghal a ni dawn a ni. LADC inthlanna neih turah hian kil thum (3) atangin inthlan hi chuh a ni dawn niin a lang a, BJP, MNF leh Congress te chuan a hrang theuhin Candidate an siam a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn