Mizoram-ah COVID-19 hri kai 50 hmuh belh leh

Niminpiah khan Mizoram-ah COVID-19 hri kai mi 50 zet hmuhchhuah leh niin Mizoram-a hri kai hmuhchhuah chu 1958 an tling ta.

Niminpiah khan ZMC Laboratory-ah Sample 854 enfiah leh niin heng atang hian COVID-19 hri kai mi 42 hmuhchhuah an ni a, heng mite hi Aizawl District-a Sample lak vek te niin mipa 30 leh hmeichhia 12 an ni a, khawtual-a hri inkaichhawn mi 23 awmin Bawngkawn-ah mi 10, Melthum leh Tuikual North-ah mi 6 ve ve leh Zarkawt-ah mi pakhat an ni. Heng bakah hian midang 19 te chu State pawn atanga rawn lut leh Quarantine Centre-a awmlai an ni a, an zinga a tam ber hi Force mi leh sa an ni thung.

Niminpiah vek khan District hrang hranga TrueNat Laboratory-ah Sample 94 enfiah niin heng atang hian hri kai mi 7 hmuh an ni bawk a, heng te hi Lunglei District ami te vek niin BSF 6 leh Assam Rifles pakhat niin Quarantine lai vek an ni bawk. Rapid Antigen Test hmangin niminpiah khan Sample 523 enfiah ni bawkin hri kai pakhat hmuhchhuah a ni bawk a, Aizawl District-a hri kai hmuh niin BSF Sipai, natna lanchhuahna awm avanga Sample enfiah a ni bawk.

Nimin khan Mizoram-a COVID-19 hri kai enkawlna hmun hrang hrang atangin mi 89 te chu hri lakah an fihlim avangin chhuahtir an ni leh bawk a, heti hian nimin tlai thleng khan Mizoram-a hri kai hmuhchhuah chu 1958 niin mi 1548 te chu enkawl dam an ni tawh bawk a, hri kai enkawllai mi 410 an la awm mek bawk a ni.

Darkar 24 chhungin kai thar aiin dam an tam zawk :

India ramah darkar 24 kalta chhungin COVID-19 hri kai hmuhchhuah tlahniam hretin mi 70,589 hmuhchhuah an ni a, hri kai enkawl dam erawh mi 84,877 an awm thung. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 11,42,811 enfiah niin heng atang hian COVID-19 hri kai hmuh thar 70,589 an awm a, heng te nen hian India rama hri kai hmuh-chhuah zawng zawng chu 61,45,291 an tling tawh a ni. Darkar 24 kalta chhung khan India ramah hri kai 84,877 te chu enkawl dam niin heng te nen hian hri kai enkawl dam zawng zawng chu 51,01,397 an tling ta a, hri kai hmuhchhuah atanga zaa 83.01 te chu enkawl dam ni tawhin tunah hian hri kai enkawllai 9,47,576 an la awm mek a ni.

Darkar 24 kalta chhung khan India ramah hri kai nunna chan zat pawh tlahniam hretin mi 776 in nunna an chan a, heng te nen hian India rama hri kai nunna chan chu 96,318 an tling tawh bawk a ni. India ramah hian Sample enfiah zawng zawng chu 7,31,10,041 an tling tawh a, heng atang hian zaa 8.40 te chuan hri hi an kai a ni.

Comments

Chhiar Hlawhte