Zofate insuihkhawmna atan sawrkar in hma la

Mizoram sawrkar chuan Zofate insuihkhawm lehna atan kawng hrang hrangin hma a la mek tih Chief Minister, Zoramthanga chuan a sawi.

Assembly Session neih zawh takah GAD changtu Chief Minister Zoramthanga chuan Aizawl North-I bialtu MLA, Vanlalhlana zawhna ziaka a chhanna ah Tripura leh Manipur lama Zofate nen intlawhpawh a awlsam zawkna atan Tripura lamah Aizawl - Behliangchhip/Phuldungsei atan leh Manipur lamah Aizawl - Churachandpur/Lamka-ah te, Myanmar lama Zofate nen intlawhpawh a awlsam zawkna atan Aizawl - Tahan inkarah Bus Service tir tuma hmalak mek a ni tih a sawi a. Hei bakah hian Mizoram pawna Zofa awmkhawm tamna hmun 10 thlangchhuakin 'Zo Kutpui' hman nan nuai 100 dah a ni a. Amaherawhchu COVID-19 vangin heng ruahmanna te hi Vanghmun (Tripura) leh Churachandpur (Manipur)-ah chiah hman a la ni hrih niin a sawi.

Zofate insuihkhawmna atan hian kumtin Chapchar Kut hman thin a ni tih Chief Minister hian a sawi a. Kut hi Aizawl District bikah chuan Zofa hmun hrang hranga awm te kan inpumkhat theihna turin an kal man te tum sakin chah thin an ni tih a sawi a. Art & Culture Department leh MZP te tangkawpin kum khat dan zelah Zofate insuihkhawm zel nan hmun hrang hranga mite sawmin 'Zofest' hman thin a ni tih a sawi bawk. Hei bakah hian kumtinin hmun 5 velah Mizo Culture vawnnun zel nan leh Zofate inpumkhat nan YMA te nen 'Cultural Meet' hman ho a ni thin a. Ramri hnaih a khawsa te tan Border Area Cultural Meet pawh kumtin ramri-ah hman thin a ni tih a sawi bawk.

Comments

Chhiar Hlawhte