Rapid Antigen Test hmanrua rawn thlen belh

COVID-19 hri vei hmuhchhuahna hmanrua Rapid Antigen Test (RAgT) Kit 20,000 chuan Inrinni khan Mizoram a lo thlen belh a, heng Test Kits te hi Chief Minister's Relief Fund atanga sum sanction hmanga lei a ni. Thla hmasa, August ni 22 khan COVID-19 enfiahna hmanrua hi 10,000 chah thlen a lo ni tawh a, tunah hian RAgT Test Kit hi 20,000 dang a lo thlen belh leh ta a ni.

Tun tuma RAgT Kit lo thleng hi lei fel a nih hnuah thla kalta, August ni 26 khan Delhi Mizoram House-ah dahfel vek a ni tawh a. A rang lama Mizoram rawn panpui tum a nih laiin West Bengal lamah Total Lockdown puan a nih avangin tlemin a khawtlai phah ta hret a ni. Tuna RAgT lo thlen belh leh inkar chhung hian RAgT Test Kit hman kawngah indaihlohna leh chatlak engmah a awm hman lo tih Health Department thuneitute chuan an sawi a. Tunah hian dan pangngaiin COVID-19 endik hna pawh kalpui chhoh reng a ni bawk a. Rapid Antigen Test hi PCR Test nen thil thuhmun a ngaih a ni bawk.