Mizoram-ah COVID-19 hri kai hmuhchhuah an pung zel

Mizoram-ah COVID-19 hri kai hmuh-chhuah an pung zel a, Zirtawpni-a Sample enfiah atangin hri kai 16 hmuh belh niin Inrinni-a Sample enfiah atangin hri kai 31 hmuhchhuah leh niin Mizoram-a hri kai hmuhchhuah chu 1093 an tling tawh.

Zirtawpni khan ZMC Laboratory-a Sample enfiah atangin hri kai 16 hmuh an ni a, Hri kai hmuhchhuah zinga mi 9 te hi Aizawl District mi niin an zinga 8 hi State pawn atanga rawn haw leh khunghran lai te an ni a, hri kai hmuhchhuah pakhat hi Zemabawk-a khawsa niin zinchhuahna neilo leh hri a kaina hriat mai theihloh a ni thung. 

Hri kai hmuhchhuah dang 3 te chu Siaha District mi niin State pawn atanga rawn haw an ni a, an zingah hian kum 4 mi a tel a. Mamit District atangin hri kai hmuhchhuah pathum bawk awmin mipa pahnih leh hmeichhia pakhat an ni a, State pawn atanga rawn haw niin Lunglei District-a sample BSF sipai pakhat chuan hri a kai tih hmuhchhuah a ni bawk.

Inrinni khan Mizoram-ah COVID-19 hri kai mi 31 zet hmuhchhuah leh an ni a, Hri kai hmuhchhuah thar te hi ZMC Laboratory-a hmuhchhuah 26 leh Rapid Antigen Test a hmuh-chhuahte hi 5 an ni. Aizawl District a hri kai hmuhchhuah thar 25 zinga 19 hi State pawn atanga kir, khunghran lai niin mipa vek an ni a, naupang kum 6 bakah puitling kum 27 leh 70 inkar an ni.

Hri kai hmuhchhuah zingah hian Thing-sulthliah a hnathawka awm zinga mi pahnih telin an kaina hriatlohte an ni a. Hri do hna thawk mek Health Department hnathawk mi 3 bakah Chanmari West-ah Local Task Force zing ami pakhat telin hri a kaina hriat theih ala nilo bawk. Lawngtlai District-ah hri kai hmuhchhuah pakhat awmin State pawn atanga rawn haw a ni a, Kolasib District-ah State pawn atanga lirthei rawn khalhluttu te atangin RAT hmangin hri kai 5 hmuhchhuah an ni bawk.