Zo Indigenous Forum ten hmalak zui zel an tum

Assam Rifles mi leh sa dan lova che te chunga action lak a nih loh chuan Zo Indigenous Forum chuan a tul anga hma an lak zel dawn thu an sawi.

Nimin-a thuchhuah an siamah Zo Indigenous Forum chuan tunhnaia Mizoram chhunga awm Assam Rifles mi leh sa te dân pawh pawisalova an chetna hrang hrangte chu hriatthiam harsa an tih thu sawiin, Mizo mipuite zahlohna leh kan dikna chanvo palzutna ah an ngaih thu an sawi a. Mipuite thlamuana venghimtu turte'n mipui tân harsatna an siamsak fo mai chu hriatthiam harsa an tih thu leh thleng nawn tawhlo se an duh thu an sawi. 

Zo Indigenous Forum chuan September ni 12, 2020 chhûn dar 12:00 vel khan, 17th Assam Rifles Major pakhat chuan Mizo driver pahnih te Hrangchalkawn bulah na taka kut an thlak thu te, August ni 15, 2020, tlai dar 4:00 vel khan Assam Rifles ten Sesih khua, Champhai District-ah hmeichhe pasal nei lai pahnih chungah mawi lo tak leh an zahawmna tibawrhbang zâwnga an chet thu leh tunhnaiah Assam Rifles mi leh sa ten Mizoram sawrkar ruahmanna leh mipuite himna ngai pawimawh duh lovin Vairengte Check gate an lo paltlang lui tawh thu te tarlangin, Nikum lamah pawh Vathuampui khua, Lawngtlai District chu tuma tlawhpawh theih lohvin an khua an lo hreng tawh bawk tih an sawi.

Heng pawikhawihna thlengte chungchangah hian thuneitute'n Assam Rifles chungah hmâ an la lo a nih chuan Zo Indigenous Forum chuan National Human Rights Commission (NHRC), National Commission for Scheduled Tribes, National Commission for Women (NCW) leh United Nations hnenah thlengin hma a la dawn tih an sawi a. Mizoram chu Disturbed Area a ni tawh lo tih pawh sawiin, Armed Forces Special Powers Act (AFSPA), 1958 hi Mizoram-ah hman a ni ve lo tih Assam Rifles mi leh sa te chu an hriattir bawk.