COVID-19 hri kai 28 hmuh belh leh an ni

Darkar 24 kalta chhung khan Mizoram-ah COVID-19 hri kai mi 28 hmuhchhuah belh leh an ni a, heng zinga pakhat tihloh chu State pawn atanga rawn lut te vek an ni.

Sawrkar thuchhuah tarlan danin niminpiah khan ZMC Laboratory-ah Sample 1127 enfiah niin heng atang hian hri kai 18 hmuhchhuah an ni a, heng mite hi Assam Rifles sipai State pawn atanga rawn lut mipa vek niin Zokhawsang Quarantine Centre-a awmlai vek an ni a, kum 25 atanga 54 inkar niin Symptom neilo vek an ni bawk. Niminpiah khan Rapid Antigen Test hmangin hri kai mi pahnih hmuhchhuah an ni bawk a, pakhat zawk hi Aizawl Bawngkawn-a cheng mipa niin hri kai hmuhchhuah tawh nen lo inkawmhnaih atanga hri kai a ni a, midang pakhat hi Kolasib District Bairabi Entry Point atanga hri kai hmuhchhuah niin Truck driver, State pawn atanga rawn lut tur a ni thung.

Niminpiah vek khan District hrang hranga TrueNat Laboratory atangin COVID-19 hri kai mi 8 hmuh an ni bawk a, heng zinga mi 6 te chu Lunglei District-a hmuhchhuah niin BSF Sipai, State pawn atanga rawn lut leh Quarantine Centre-a awmlai niin midang pahnih te hi Serchhip District a hmuhchhuah, Tantia Construction Company hnuaia thawk tur, State pawn atanga rawn lut leh Thenzawl-a anmahni hmun-a inkhunghrang mek te an ni bawk.

Nimin khan Mizoram-ah hri kai enkawl dam mi 24 awmin Mizoram-a COVID-19 hri kai hmuhchhuah 1534 an tling tawh a, heng te hi mipa 1260 leh hmeichhia 274 niin heng zinga mi 973 te chu enkawl dam an ni tawh a, tunah hian hri kai enkawllai 561 an la awm mek a ni.

India rama COVID-19 hri kai nuai 52 tling ta :

India ramah darkar 24 kalta chhung khan COVID-19 hri kai 96,424 hmuh belh leh niin India rama hri kai hmuhchhuah chu nuai 52 an tling tawh. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 10,06,615 enfiah niin heng atang hian COVID-19 hri kai 96,424 hmuh an ni a, heti hian India rama sample enfiah zawng zawng 6,15,72,343 atanga hri kai hmuh chu 52,14,677 an tling tawh a, Sample enfiah zawng zawng atanga chhutin zaa 8.46 te chuan hri hi an kai a ni. Darkar 24 kalta chhung khan India ramah hri kai 87,472 te chu enkawl dam niin tun thlengin mi 41,12,551 te chu enkawl dam an ni tawh a, hei hi hri kai hmuhchhuah atanga zaa 78.86 niin hri kai enkawllai 10,17,754 an la awm mek bawk a ni.

India ramah hian darkar 24 kalta chhungin hri kai nunna chan 1,174 zet awm lehin India a hri kai zinga nunna chan zawng zawng chu 84,372 an tling tawh a, India rama State leh UT 35-ah hri kai hi hmuhchhuah an ni tawh a ni.

Comments

Chhiar Hlawhte