Zirtirtu tha thlanchhuah te chawimawi an ni

Nimin khan Aizawl leh Khawzawl-ah an District huamchhunga zirtirtu hnathawk tha thlanchhuah te hnenah chawimawina hlan an ni.

Aizawl District-a Zirtirtu tha thlanchhuahte chawimawina, District Award hlanna hun hi School Education Complex Conference Hall, Mc Donald Hill-ah neih niin School Education Department Joint Director leh Samagra Shiksha-a State Project Director, Lalhmachhuana chuan a hmanpui a, Zirtirtu hnathawk tha chawimawi tlak an tam viau laiin Award hmuh dan kalphung tharah mahni inphochhuah a tul tak avangin zirtirtu tha tam takin an hreh tih a sawi a. National Award pawh Mizoram chhunga zirtirtu zingah hmu an awmloh nachhan ni a lang chu zirtirtu tha kan neih loh vang ni lovin, Award hi mahni ngeiin dil a ngaih tak avanga a dawng thei tura an inlan that loh vang a nih thu a sawi bawk.

He hunah hian Aizawl District huamchhunga zirtirtu tha thlan-chhuah mi pathum (3) hnenah District Award hlan niin Award dawngtute hi Zoliana, Headmaster, Govt Chite Primary School; R.Lalhuliana, Headmaster, Modern English School leh C. Lalhluna, Headmaster, Govt Bethlehem Vengthlang High School te niin thuziak leh Rs. 5000/- hlan an ni a, Aizawl District huamchhunga zirtirtu tha thlannaa District-in a chhawpchhuah kal zelah R.Lalpianthanga, Teacher, Govt Chawnpui Primary School chuan State Award a lo dawng tawh a ni.

Nimin vek khan Khawzawl-ah pawh District Level Teacher Award 2020 for Primary Section chu District Bawrhsap, Zothanmawia chuan Rabung Primary School-I Zirtirtu, Rochungnunga Ralte hnenah a hlan a, District Level Teacher Award 2020 hi Champhai District Un-divided anga kalpui niin chawimawina hian pawisafai Rs. 5,000/-; Certificate leh Momento a keng tel a ni.

Comments

Chhiar Hlawhte