MPCC in Deputy Chief Minister bang tura an phut thu an sawi

Mizoram Pradesh Congress Committee (MPCC) chuan Deputy Chief Minister, Tawnluia vangin Khawzawl leh a chhehvel-ah buaina a thleng nasa nia sawiin, Deputy Chief Minister chu bang tura an phut thu an sawi.

Nimin-a thuchhuah an siamah MPCC chuan Village Council inthlan neih zawh takah Khawzawl khawchhung leh a chhehvelah MNF Party hruaitute avangin buaina a thleng nasa hle tih tarlangin, Khawzawl khawchhunga MNF-in sawrkarna an siam theih lohna Veng thenkhata Congress Party leh ZPM Party ticket-a thlantlinte chu MNF party hruaituten MNF VC siampui tura sawmin, thil chi hrang hrang tiamin an thlem nasa hle tih an tarlang a. Dy. Chief Minister, bialtu MLA ni bawk Tawnluia thu hmuin, a hming chhal meuhin Contract leh sawrkar hna tawktarhin an thlem nasa hle niin an tarlang. MPCC chuan Khawzawl mai ni lovin, Tualte-ah pawh hetiang harsatna hi a thleng mek nia tarlangin, Riangtlei-ah phei chuan ZPM Ticket-a thlantlin chu vau betin sawrkarna an siam phah hial tawh tih an tarlang a, Tlangpui-ah pawh an tuilakna tur project tihtawp sakah vauin, MNF VC siam tumin Tawnluia hmingin an che nasa hle bawk tih an tarlang.

MPCC thuchhuah chuan VC inthlanna tluang taka neih zawh a nih hnua MNF party hotuten an chaklohna an pawm thei lo leh contract, sawrkar hna leh thil chi hrang hrang tawktarha party dang atanga thlantlin te laka mawilo taka chet an thawh vak mai chu VC thlangtlingtu mipuite duhthlanna zahlohna a ni tih sawiin, heng zawng zawng hi Dy. Chief Minister, Tawnluia thu hmu a ti an ni tih a chiang hle bawk tih an tarlang a. Mizo politician zingah pawh Senior berte zinga mi, Dy. Chief Minister hial ni pha Tawnluia chet duh dan chu mak an tih thu leh an hriatthiam theihloh thu sawiin, ram hruaitu ni tlakah an ngaih loh thu leh a rang thei ang bera a nihna atanga bang ngei tura an phut thu an sawi bawk.

Village Council leh Local Council member atana mipuite'n duh taka an thlantlinte chu mipuite duhthlanna zahsak tur leh thlemna bawlhhlawh tak karah pawh anmahni thlang tlingtu mipuite hre renga huaisen taka ding zel tura an beisei thu MPCC thuchhuah chuan an tarlang a. Eptu Party VC leh LC pawh nise sawrkar laipui atanga an chanpual tur pawisa lo kal hi kim takin an dawng vek dawn tho tih tarlangin, “Helaia MNF sawrkarin alo tih danglam theih a ni lo tih kan inhriattir nawn leh bawk a ni,” an ti.