Chanchin thar thenkhat :

Law Commission thukhawm

Mizoram State Law Commission chu nimin khan an Chairman, Lala Khobung hovin a Office Chamber-ah an thukhawm a. Mizoram State Law Commission thutkhawm vawi 37-na ah hian The Mizo Marriage, Divorce and Inheritance of Property Act, 2014 hman mek chu a taka kalpui a nih hnuah ennawn leh siam that ngai te a awm nia hriain an sawiho a. A tul angin sawrkar ah recommendation siam nise an ti. Hei bakah hian The Mizoram Civil Courts Act, 2005 pawh sawiho niin tuna Mizoram-a Court hrang hrangte thuneihna chin te, thubuai hlabuai an ngaihtuah theih chin leh thubuai hlabuai kaihhnawiha sum leh pai an khawih theih zatte an sawiho a. A tul angin Mizoram sawrkarah recommendation siam nise an ti a. Hei bakah hian thil tuldangte pawh an sawiho bawk.


RAT kalpui leh rih dawn

Mizoram sawrkar-a Health Secretary in Vairengte leh Kanhmun atanga Mizoram-a rawn lut turte Rapid Antigen Test tih sak thin chu tih-tawp rih a nih dawn thu niminpiah-a thuchhuah siama a tarlan hnuah nimin khan Kolasib DC, Dr. H. Lalthlangliana chuan thuthar thehdarhtute kawmin Chief Secretary hnen atanga thu a dawn danin, Vairengte Check gate ah Rapid Antigen Test kalpui chhunzawm a nih tur thu a sawi a. Kolasib DC chuan mipui himna tur leh thlamuanna turin Sawrkarin ruahmanna a siam thin thu a sawi a, Vairengte Check Gate a Rapid Antigen Test pawh tha tak a kalpui chhunzawm a ni dawn tih Chief Secretary atangin thu a dawng tih sawiin, nimin khan thuchhuah siam nghal a ni bawk.


Hri kai mi 6 hmu leh

Nimin khan Mizoram-ah COVID-19 hri kai mi 6 hmuh leh an ni a, heng mite State pawnlam atanga rawn lut niin sipai 2, Civil mi 2 leh Driver mi 2 niin Driver te hi Rapid Antigen Test atang hri kai tih hmuhchhuah an ni. Nimin vek khan Mizoram-ah hri kai enkawl dam mi 12 te chu chhuahtir an ni bawk.


VC leh LC inthlanna neih a ni

Hripui leng avanga a hun taka Local Council leh Village Council inthlan neih theihloha hmun Local Council 22 leh Village Council 8-ah te chuan nimin khan State Election Commission ruahman angin inthlanna neiin mipui ten Vote an thlak a, heng Vote thlakna hmunah te hian nimin zing dar 7:00 atangin mipui ten Vote an thlak a, nizan khan Vote tla te hi chhiar nghal tura ruahman a ni. Heti hian VC leh LC inthlanna neihna tur zingah Local Council pahnih- Ramhlun South leh Chaltlang Lily Veng tihloh ah chuan inthlanna neih a ni ta a ni.


Vawiin Teachers’ Day

Vawiin September 5, 2020 hi India President 2-na leh Vice President hmasa ber, Dr. Sarvepalli Radhakrishnan-a pianchamphaphak a ni a, he Ni hi India ramah chuan Zirtirtute ni, Teacher's Day atana hman thin a ni. Kumin a Teacher's Day hi hripui leng avangin Serchhip ah chuan a hranin hun hman a ni dawn lova, School Education Department chuan he ni pual hian Serchhip khawpui lunlai hmun hnih ah Banner tarin kumdanga he ni puala hun hman thin ang chu hman a ni dawnlo thung a ni.


Cheng vbc. 179 man lei tawh

Mizoram-ah COVID-19 dona atan bung-rua chi hrang hrang Rs. 1,79,724,476/- man lei a ni tawh. Mizoram Legislative Assembly thut-khawm neih zawh takah Congress Member, Zodintluanga zawhna ziaka a channa ah he thu hi tarlangin Health Minister, Dr. R. Lalthangliana chuan COVID-10 dona atan hian Directorate of Health Services hnuaiah bungrua chi hrang hrang 42 lei tawh a nih tawh thu leh hemi atan hian Rs. 5,77,25,260/- sen a nih tawh thu a tarlang a. Directorate of Hospital & Medical Education hnuaiah bungrua chi hrang hrang 38 lei tawh niin Rs 7,85,08,892/- sen a ni bawk.

Heng bakah hian NHM hnuaiah bung-rua chi hrang hrang 6 lei tawh niin hemi atan hian Rs. 3,69,50,354/- sen a ni a, AYUSH hnuaiah bungrua chi hrang hrang 6 lei tawh niin hemi atan hian Rs. 37,19,750/- sen a ni bawk a; ZMC hnuaiah bungrua 1 leina atan Rs. 28,20,220 sen a ni bawk.


Bru te paih dilna la awmlo

Tripura-a Bru-te Mizoram Electoral Roll atanga paih tura dilna a awm lo tih GAD changtu Chief Minister, Zoramthanga chuan a sawi. Assembly Session neih zawh takah ZPM Legislature Party Leader, Lalduhoma zawhna ziaka chhanga he thu hi sawiin Chief Minister chuan Mizoram (Election to Village Councils) Rules, 2014-in a sawi angin, Last Published Electoral Rolls of Legislative Assembly Constituencies (Election Commission of India) chu Draft Roll emaw, mother Roll-ah hman tur a nih angin VC inthlanah pawh khan MLA inthlan hnuhnung bera Electoral Roll chu Draft/Mother Roll atan hman a nih thu leh chutah chuan Tripura-a awm Bru-te pawh an hming ala chuan thu a tarlang a. “Revision neih laiin Bru-te chu paih (delete) tura dilna a awm loh avangin Final Electoral Roll-ah pawh an la tel zel a, chuvang chuan candidate leh voter an nih theih lohna a awm lo a ni,” a ti.

Comments

Chhiar Hlawhte