West Saizawh khuaa thil thleng avangin Chakma pawnchhuah khapin Chakma House khar a ni

Niminpiah tlai khan Chakma Autonomous District Council (CADC) huamchhunga West Saizawh khua ah Mizo pakhat chu Chakma ten kut an thlak nia sawi a ni a, hei vang hian MZP chuan nimin atang khan Chakma te pawnchhuah khapin MSU pawhin Aizawl-a Chakma House chu mikhual thleng belh theilo turin an khar sak bawk.

He thil thleng chungchanga Mizo Students’ Union (MSU) General Hqrs. thuchhuah siamin a tarlan danin niminpiah (Sept. 3, 2020) tlai khan CADC huamchhung, West Saizawh khaw chhehvel a Chakma nula leh tlangvalte chu West Saizawh High School-ah ruihhlo tih tuma kalin Saizawh khua a haw tur Mizo tlangval te’n lo hmuin School Compound a nih avangin ruihtheih thil tih a remloh thu an hrilh hnuah buaina em em awm lovin an in tinsan a. Hemi hnu hian Chakma thalai rualte chu inkokhawmin Mizo tlangval zinga motor khalhtu, Mamtea chu a Sumo dahtha lai nangchingin an khawih rawn nia sawiin, Hospital panpui ngai hial khawpin an sawisa tih an sawi a. Hemi hnu hian Savidge-a chu an In-ah kalchilhin an chhungkaw zanriah eilai an va pawt chhuak a, khawtlang hruaitute’n rawn nang ching hmanin an khawihnat hmain an chhan hman ta hlauh niin an tarlang bawk.

He thil thlenga mawhphurtute hi manchhuak turin MSU chuan Mizoram sawrkar phutin thil sual titute man kim an nih hma chu Aizawl-a Chakma House chu an khar sak nghal a, MSU chuan nimin tlai thleng khan mi 12 man an nih tawh thu sawiin, an vai hian Kamalanagar mi vek niin an sawi a. He thil-a inhnamhnawih te man kim an nih hma chuan Aizawl Hunthar-a Chakma House chu khar chhunzawm tur a ni tih an sawi bawk.

Hetihlai hian nimin vek khan MZP General Hqrs. pawh Aizawl-ah thukhawm nghalin kan ram chhungah mikhual chamrei Chakma ten huangtau taka ram neitu kut an thlak ngam chu MZP chuan a la na takzet tih sawiin, Chakma pawnchhuah khap nghal a ni tih an sawi a. Chakma te pawnchhuah khap a nih bakah Chakma ten Mizo tlangval kut an thlakna Saizawh khua ah hian thil awmzia thlithlai a, Mizote thlavang hauh tur hian an President, B. Vanlaltana leh General Secretary, Lalnunmawia Pautu bakah MZP hruaitu rual te an kal nghal tih an sawi bawk.