Hri kai thenkhat enkawl dam an nih hmaa chhuah tir vangin mipui hriatthiamna dil

Health Minister, Dr. R. Lalthangliana chuan Mizoram-a COVID-19 hri kai thenkhat enkawl dam an nih hmaa chhuahtir an nih chungchangah mipui hriatthiamna a dil.

Mizoram Legislative Assembly thutkhawm nimin-a chhunzawm ah Eptu pawl Group Leader, Lalduhoma chuan ‘Revised Discharge Policy for COVID-19’ hmanga hri kai thenkhat enkawl dam an nih hmaa damdawi In atanga chhuahtir an nih chungchang Calling Attention Motion putlutin Mizoram sawrkar-in COVID-19 hri kai damlote damdawi In atanga chhuahtirna dan, Discharge Policy a duan chu hmang rih lo turin Sawrkar a ngen a. Lalduhoma chuan, Revised Discharge Policy for COVID-19 hmanga hri kai thenkhat enkawl dam an nih hmaa damdawi In atanga chhuahtir phalna hi State dangah pawh zawm a hlawh lem lo tih sawiin, Sawrkar laipuiin mipui zawm tur dan a siam, Standard Operating Procedure-ah pawh ngaih pawimawh a hlawh lem lo tih a sawi a. Tuna Mizoram Sawrkar-in a duan mek Discharge Policy hi hman mai tum a nih chuan tha dawn lo hle-a a hrait thu leh Mizoram dinhmunah an la zawh a rin rihloh thu a sawi a. Dan hi an lo duang a nih pawhin hman rih loh ni se a duh tih a sawi a ni.

Opposition Group Leader, Lalduhoma chuan, tunah hian vanneihthlak takin Mizoram-ah hri kai aiin kailo an tam zawk tih sawiin, tun dinhmunah chuan an la inenkawl thei rih niin a lang tih a sawi a. Ni 10 ral hnua inchhuah mai tur hian policy duan thar pawh ni se tih rihloh hram ni se, amaherawh chu hmalam hun zel tur tuman an hre lawk lova, enkawl senloh khawp damlo an lo awm a nih a, tihngaihna a awm ngang lo a nih erawh chuan loh theih lo-a in chhuahtir te pawh a ngaih hun a awm mai thei a, chutiang thil in a nang ta a nih loh chuan damlo enkawl dam pawh la ni lo, ni 10 an awm tawh vanga inchhuah tir mai chu tih loh hram hram tha a tih thu a sawi bawk.

Calling Attention Motion putluh chungchang hi Health Minister, Dr. R. Lalthangliana chuan sawifiahin hri kai thenkhat enkawl dam an nih hmaa chhuahtir an nih chungchangah mipui hriatthiamna a dil a, Health Minister chuan heng mi damdawi In atanga chhuahtir zinga mmi 7 chu koh let leh vek an ni tawh tih House a hrilh a. An zinga Bihar lam mi chu Mizoram a lo chhuahsan tawh nia hriat a ni tih a sawi bawk. Health Minister chuan hri leng a darh zel loh nan theihtawp chhuah a ni tih House chu hrilhin, COVID-19 hri leng mek hian eng chen nge a awh dawn hriat a nih loh avangin mipuite chu mahni theihna chin chinah fimkhur turin a chah bawk.

Comments

Chhiar Hlawhte