VC 14 insiam fel kim ta

Serchhip Town chhunga Village Council hrang hrangte chuan Executive Body siam fel zelin nimin khan VC pahnih te chuan Executive Body an siam fel ve leh.

Serchhip-II Village Council atanga indang, Seat 5 awmna Serchhip Darnam VC-ah nimin khan Executive Body siam fel a ni a, VC inthlan neih zawh takah khan MNF Party chuan Seat 3 la in ZPM chuan Seat 2 an la thung a, hun engemaw chhung VC Executive Body siamfel loha a awm hnuah nimin khan VC Executive Body hi siam felin MNF in sawrkar an siam dawn ta a, C. Lalengzauva chu VC President atan thlan niin KC. Lalngaihzuala chu Vice President a ni anga, Chanchinmawia chu Treasurer a ni bawk ang.

Seat 7 awmna New Serchhip South VC ah pawh nimin khan VC Executive Body hi siam fel niin MNF atanga thlantlin Rengliana chu VCP a ni anga, Lalthuamliana chu Vice President niin Treasurer-ah Lalrinhlui a ni bawk ang. New Ser-chhip South VC-ah hian Seat 7 awmah MNF hian seat 4 an la a, INC in Seat 2 lain ZPM chuan Seat khat an la bawk a ni.

Heti hian Serchhip Town chhunga VC 14 awm-ah VC tin ten Executive Body an siam fel ta niin a lang a, heng thlan thar te hian Returning Officer te hnenah VC Executive Body an siam fel thu hi thlenin VC an Form fel hnuah thuneitute hnenah thehluh leh a ni anga, karleh Thawhlehni, September 8, 2020 atang khian VC mawhphurhna hi an la tan dawn a ni.

Comments

Chhiar Hlawhte