Vairengte-ah Screening Point siam belh tul ti

National Students' Union of India Mizoram State (NSUI-MZ) chuan Vairengte-ah Screening Point siam belh vat a nih theih nana hma la tura Mizoram sawrkar thuneitute an phut thu an sawi.

Nimin a thuchhuah an siamah NSUI (MZ) chuan kan mamawh lakluhna ber, Vairengte Screening Point-ah Rapit Antigen Test (RAgT) titu tur Laboratory Technician an indaihloh avangin Driver te test zung zung theih an nilo tih sawiin, hei vang hian lirthei tangkhang a tamin an inhnawh tawt nasa em em tih an sawi a. Lirthei dang tan pawh kal leh veivah harsa khawpin lirthei tangkhang ding a tam thu leh kan nitin mamawh eichawp leh bungrua tam tak pawh duh angin a rawn lut zung zung theih loh phah tih an sawi a. Hei vang hian a tul anga hmala nghala Vairengte-ah Screening Point siam belh vat a nih theih nana hma la turin Mizoram Sawrkar thuneitute an phut thu an sawi a ni.

Hei bakah hian NZUI (MZ) chuan tun thla ni 12 zan-a Mizoram mamawh phurtu Oil Tanker Drivers te kutthlak an ni chu an ngai thutak hle tih pawh sawiin, hemi chungchanga Dholai Police Station-a FIR thehluh pawh an vil reng dawn tih an sawi bawk.