Serchhip District-a VC thlan tharte tana Foundation Training neih dan tur ngaihtuah

/

Village Council inthlanpui neih zawh a nih hnuah Serchhip District-a VC atana thlan thar te tana Foundation Training neih dan tur chungchang ngaihtuahin nimin khan District Bawrhsap, Kumar Abhishek IAS hovin District Level Task Force on COVID-19 chu an thukhawm.

Serchhip DC Meeting Hall-a thutkhawm ah hian District Bawrhsap, Kumar Abhishek chuan hripuiin min chim mek mah se sawrkar hna te chu tha taka kalpui zel a ngai tih sawiin, a bikin tunhnaia thlan thar VC members te chu 15th Finance Commission atanga an sum dawn tur an hman dan tur chungchang ah te, ni za inhlawhna an kalpui zel dan tur ah te, Village Level Task Force on COVID-19 an kalpui dan turte leh an awm dan tur sawrkar dan hrang hrang te rang taka an zira hnathawk theia buatsaih thuai an tul thu a sawi a. Chutihlaiin hripui inkaichhawn theihna laka fihlim chunga training tir dan zawn a tul bawk tih sawiin, chung thilte ngaihtuah chungah hmalak a tul thu a sawi bawk.

State Institute of Rural Development & Panchayati Raj (SIRD&PR) bultuma VC te tana Foundation Training neih dan tur ngaihtuahna ah hian SIRD&PR District Panchayat Resource Centre-a Head Faculty, Vanlalhruaia chuan Village Council member thlan tharte tana Foundation Training Course mumal taka kalpui a tul chhan leh training dan tur ruahmanna an siam chin te sawifiahin, hemi hnu hian Meeting hian COVID-19 hripui laka himna dante zawm chunga training kalpui a nih theih dan tur nia an ngaih te leh a hun leh a hmun turte an sawiho a. Training chu sawrkar in phunkhawm a phal sak zat chin pello leh inhlata awm tura phal chin (Social Distancing) dante zawm chunga October thla chhova a indawta neih dan tur duan nise an ti a. DPRC-a Head Faculty chu a chipchiara lo duang tur leh a ruahmanna te chu DC leh Medical lamte nena la thlirho leh nise an ti a. He training hi Serchhip leh E. Lungdar-ah te buatsaih nise tiin an rel bawk.

Hei bakah hian Covid Care Centre (CCC), Nursing School-a Tui Supply chungchang leh mipuiten hmaituamna an hman that leh that loh chungchang thlirletna te he hunah hian neih niin hri leng dona kawnga thil pawimawh hrang hrangte pawh sawiho a ni a, he thutkhawm ah hian Serchhip SP, R. Sathiyasundaram IPS leh Addl. DC, Lalmuansanga Ralte bakah District Level Task Force Member dangte an tel a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »