State Health Care Scheme Governing Body thukhawm

Mizoram State Health Care Scheme Governing Body chu nimin khan Chief Minister, Zo-ramthanga hova thukhawmin hmalakna hrang hrang thlirho a ni.

CM Conference Hall-a Mizoram State Health Care Scheme Governing Body thutkhawm ah hian nikum October ni 1 atanga September ni 3 thlenga Revised Mizoram Health Care Scheme hnuaia hamthatna pek dan thlirin, he Scheme hian Hospital a riaklutte bakah natna 26, OPD-a inenkawlna a huam a. A vaiin Rs. 32,59,88,780 pekchhuah a niin, heng zingah hian Private Hospital a inenkawl an tam zawk a, Private Hospital-a inenkawl hi 7435 niin sawrkar Hospital-a inenkawl chu mi 4190 an ni.

AB PM-JAY hnuaia inenkawlna man Bill pek sak pawh a vaiin Rs. 19,69,17,804 a ni a. Sawrkar Hospital a inenkawl mi 16,906 niin Private Hospital a inenkawl chu 2084 an ni thung a. State Referral Hospital Falkawn chu COVID-19 hrileng avanga COVID veite enkawlna tur bik atana hman a nih tak avanga Public Hospital a inenkawl zat hi tlakhniam phah ta nia ngaih a ni.

He thutkhawm ah hian District tin a Health Care Scheme an hman dan a rualkhai loh thu sawilan niin, inhrilhhriatna leh inzirtirna tha zawk neih pawimawh an ti a. Chutihrual chuan claim lut zawng zawng atanga natna hrang hrang an thliar chhuah atangin Cancer inenkawlna a langsar ber a. Nau neihna, Thin, Chuap, Kal leh Zun kawng natna, Zu kaihhnawih natna, Pneumonia leh a dangte pawh natna tam ber zinga mi a ni.

Hei bakah hian sawrkar in mipuite harsatna hrethiam a State hrisel zawk kan nih theih nan a inenkawlna man tum sak a hma a lakna chu lawmawm an tih thu an sawi a. Amaherawhchu hriselna tluantling nei tur chuan hriselna lama tan kan lak thar a, kan theih chen chen a fimkhur theih dan inzirtir thar a pawimawh thu sawilan a ni bawk.