Hri kai pakhat dam leh ta

Serchhip District-a COVID-19 hri kai hmuh-chhuah pakhat chu enkawl dam a nih hnuah nimin khan DCHC atanga chhuahtir niin Serchhip District-a COVID-19 hri kai hmuhchhuah zingah mi 12 te chu enkawl dam an ni tawh.

Serchhip CMO Office atanga thu kan dawn danin Serchhip District-a COVID-19 hri kai enkawl dam tak hi August 17-a Serchhip District rawn thleng niin Company hnuaia thawk a ni a, Thenzawl-a inkhunghrang niin a tirah Rapid Antigen Test hmanga enfiahin hri kai lo niin hriat ni mah se RT-PCR hmanga enfiah a nih hnu August 26 khan hri a kai tih hmuhchhuah a ni a, hemi ni vek hian Tarpi Tlang-a DCHC-ah hian dahluh niin niminpiah-a a sample enfiah leh a nih hnuah hri lakah a fihlim tak avangin nimin khan chhuahtir a ni ta a ni.

Nimin thleng khan Serchhip District-ah hian COVID-19 hri kai hmuhchhuah chu mi 19 tling tawhin tun thlengin mi 12 enkawl dam an ni tawh a, tunah hian hri kai enkawllai mi 7 an la awm mek a ni. Tarlan tawh thin angin Ser-chhip District-ah hian hmundang-a hri kai hmuh-chhuah enkawl tur rawn dah belh reng an nih avangin hri kai enkawllai erawh tun dinhmunah mi 24 an la awm mek a, SIRD-a DCHC-ah mi 4, Nursing School-a CCC-ah mi 13 leh AYUSH Hospital Thenzawl-a CCC-ah mi 7 an awm mek a ni.