State Election Commission-ah lungawilohna thlen

Village Council inthlanpui neih zawh taka Zawlpui khuaa INC Candidate te chuan, inthlan chungchanga thil fello leh diklo tak a inrawlh ngei ni a hriat avangin nimin khan State Election Commission-ah an lungawihlohna an thlen.

Lungawi-lohna thlentu INC Candidate te hian an lehkha thehluh-a an tarlan zingah, Counting Agent te chu vote chhiar zawh hma, General seat chhiar zawh hnu leh Reserved Seat vote chhiar zawh hma si in Counting Hall chhuahsan tir vek an nih bakah, Dan dinglaiin Counting Agent te hnai taka vote chhiar lai endik a phalsak laiin hla taka thut tir an nih thu an tarlang a. Electoral Roll-a hming awm lo Vote thlak tir a ni chu Election Agent ten sawisel mah se, RO-in vote a thlak tir niin an tarlang bawk a ni.

Hei bakah hian, Vote chhiar nawn hun hawn a nih loh thu pawh tarlangin, Dan dinglaiin Vote chhiar nawn dilna hun hawn a tih laiin, hun hawn a ni lo chu Dan bawhchhiatna a nih thu an sawi a. Heng avang hian, Zawlpui Village Council-a INC candidate te chuan Inthlan fel fai taka neih a nih loh thu sawiin, a rang thei ang ber-a Section 86 of the Mizoram (Election to Village Council) Rules 2014 hnuaiah Election Tribunal din sak a, thil diklo awm te chhui chian saka, uluk taka vote chhiar that ngei a nih theih nan hma lak sak turin SEC an ngen a. Hei bakah hian Election neihpuitu, Official ten diklo taka inthlan an neihpui avangin Dan anga hma lak sak turin SEC chu an ngen bawk a ni.

Hei bakah hian Zawlnuam Vengpui Village Council inthlan neih zawh taka Independent Candidate te pawhin VC inthlanna neih zawh taka vote chhiar dan chungchangah thil fello tam tak awm ni a an hriat avangin State Election Commission-ah an lungawilohna thlenin, a rang thei ang bera hma lak sak turin an ngen bawk a ni.

Comments

Chhiar Hlawhte