Mi thenkhat ten ZNP an din thar thu an puang; ZPM in mipuite chi-ai lo turin an chah

Zoram People Movement (ZPM) inkaihhruaina dan duhkhawp loh vangin ZPM Party hruaitu thenkhat chu chhuakin an kalsan tawh Zoram Nationalist Party (ZNP) inkaihruainaah an let leh thu nimin khan chanchinthar lakhawmtute hmaah an puang.

Nimin-a Aizawl Press Club-a thuthar lakhawmtute an kawmna hunah ZPM Party a PAC Member ni thin, Sanghluna, ZNP Convener chuan, ZPM inkaihhruaina chu an duhkhawp loh thu sawiin, ZPM Party chu pawnlam langthei china mawi taka awm leh chhungril lam nget ru tam tak a ni, a ti a. Inkaihhruaina danah pawh hruaitu in mahni thuneihna dahsang tak, Dictator ang mai-a pawl kaihhruai a nih thu sawiin, Thingbul, lungbul be thin, Missionary-te kaltlanga chanchin tha hmanga a zawhchhuah Zofate hi Lalpa chhiahhlawh Pastor Chhawna hmangin kan kawng tur hi sawi lawk a ni tawh tih a sawi a. Heng kan ram-a Political Party-te rorelna an kuta pek a nih turah hian, Party hming a lan ngailoh thu leh Symbol chiah a lang thin tih sawiin, “Pastor Chhawna Inlarna hmuhah hian Lukhum a lang lo. Kan ram-a roreltu turte symbol chu Sai, Ar, Kutphah, Arsi leh Ni chiah a lang. Inlarna ang zelin a lo lan hun a awm. Keini Zoram Nationalist Party-te hi Ni symbol a hmangtu, Election Commission of India pawhin a recognise leh a register thlap kan ni,” a ti bawk.

Hetihlai hian nimin vek khan ZPM General Hqrs. chuan thuchhuah siamin mi thenkhatin nikum (2019) lam daiha thiah tawh, thiah a nih thu pawh Election Commission of India hnena thlen vek tawh, ZNP an din thar leh thu an puang nia sawiin, hei hi an sawifiah a. ZPM chuan kumin July 15-a ZPM Extended PAC Meeting chuan ZPM Elected OB Term kumin August 5-a tawp tur chungchang leh an kal zel dan tur relin, ZNP din thar lehtu ten an sawi angin, 'Pawl-a thuneitu ber Executive Meeting chu September thla ralhmaa koh tum hram nise, koh theih a nih loh chuan PAC in ngaihtuah nawn leh se,' tia pass a nih thu an tarlang a. COVID-19 chuan kiam lam aia pun lam a pan zel avang leh September thla chhung pawhin Executive Meeting chu koh theih loh tur nia a lan tak a vangin August 12, 2020 khan Extended PAC Meeting ko lehin ngaihtuah nawn a nih hnuah lungrual takin hruaitu thar (elected O.B) tur chu Val Upa Council (VUC) kuta dah a ni leh ta tih an tarlang a. He Extended PAC Meeting-ah hian ZNP din thar leh tute sawi anga boruak chhia a awm loh thu an sawi bawk. ZPM thuchhuah chuan ZNP din thar leh tute hian VUC an ring zo lo a ni ber tih pawh tarlangin, “VUC ber ring zo lo chu ZPM-ah an leng ta lova, an chhuak a, party thiah tawh hnu ZNP an din thar leh ta a ni,” an ti bawk.