FCI bukna ang Zuangtui Kudam-ah hman tum a ni

Food, Civil Supplies & Consumer Affairs changtu Minister, K. Lalrinliana chuan FCI ion bukna an hmanlai ang chu Zuangtui Kudam-ah hman tum a nih thu a sawi.

Nimin a Assembly inkhawm zawhna leh chhanna hunah ZPM member, Dr. Vanlalthlana zawhna chhanga he thu hi sawiin Supply Minister chuan buhfai bukna khawl inang lovah a buk rih zawng a danglam theih avangin buhfai phurtuten an chawi fo a, chutiang harsatna thleng thin tireh turin FCI ten an hman lai, Leotronic Scales Pvt. Ltd. ang chiah chu Zuangtui Kudam-ah hman tura bun mek a nih thu a sawi a ni. Minister chuan, FCI kudam atanga buhfai lakte chu sawrkar kudam-a dah a nihin Digital Weighbridge emaw, Digital Weighing Scale emaw, Beam Scale emaw, Manual emaw te hman a ni tih sawiin, tun dinhmunah Digital Scale chu hmun 3-ah hman a ni a, Manual Scale chu hmun 117-ah hman a nih thu a sawi bawk. Sawrkar Kudam 3- GMG, Zuangtui I & II te bakah Serchhip SDC-ah te Digital Weighing Machine hman mek a ni a, Department-in a dang a neih loh vangin hmun dangah chuan hetiang bukna hi hman a ni lo tih a sawi bawk.