Serchhip-a SIRD DCHC a taka hman tum niin Chhiahtlang-ah CCC pakhat hman tan a ni

Serchhip Tarpi Tlang SIRD building chu Dedicated COVID Health Centre (DCHC) atana ruahman a nih angin a taka hman a ni dawn a, helai hmuna hri kai enkawl mek te pawh nimin khan Highway Restaurant (Tourist Lodge Chhiahtlang) CCC-ah sawn an ni a. Serchhip District-a hri kai hmuhchhuah pakhat chu nimin khan enkawl dam a ni bawk.

Serchhip CMO Office atanga thu kan dawn danin SIRD building hi DCHC a nih angin COVID-19 hri kai zingah Symptom nei te enkawlna hmun atan hman a ni dawn a, amaherawh chu Serchhip-a COVID-19 hri kai hmuhchhuah an nih hnu khan hri kai hmuhchhuah enkawlna atana hman a ni chho ta ngar ngar a, tunah erawh chuan a nihna ang taka hman a nih theihna turin helai hmuna hri kai enkawllai mi pathum te leh anmahni enkawltute chu nimin khan Chhiahtlang Highway Restaurant CCC-ah sawn an ni a, hemi hmalam hian Highway Restaurant hi CCC atan ruahman ni tawh mah se Quarantine Centre indaihlohna avangin Quarantine Centre atan hian hun engemaw chen chu hman a lo ni tawh a ni.

Hetianga ruahman lawk anga Highway Restaurant chu CCC-a hman a nih tak avang hian Quarantine Centre indaihlohna a awm theih avangin Health Department Staff Quarantine Centre tura ruahman, TKS Camping Centre chu Quarantine Centre-ah hman a ni ta thung a, nizan hmasa khan helai hmunah hian BSF Sipai thenkhat te pawh dahluh nghal an ni.

Hetihlai hian Serchhip District-a COVID-19 hri kai enkawl mi pakhat chu enkawl dam a nih hnuah nimin khan chhuahtir a ni a. Nimin a hri kai enkawl dam tak hi Sipai chawlh hmang tur niin August 16, 2020 khan Assam atangin a rawn haw a, Tourist Lodge-ah khunghran nghal niin Rapid Antigen Test hmanga enfiah a nih hnuah hri a kai tih hmuhchhuah a nih avangin Tarpi Tlang-a SIRD DCHC-ah dahluh nghal a ni a, hun engemaw chen enkawl a nih hnuah hri lakah hian fihlim lawk lovin niminpiah a Sample enfiah leh a nih hnuah hri laka a fihlim tak avangin nimin khan chhuahtir a ni ta a ni.

Heti hian tun thlengin Serchhip District-ah COVID-19 hri kai hmuhchhuah mi 19 awm tawhin mi 13 te chu enkawl dam an ni tawh a, tunah hian hri kai enkawllai mi 6 an la awm mek a ni.

Comments

Chhiar Hlawhte