Serchhip District-a COVID-19 hri leng dona a thawk tura inpe mi 42 zet an awm tawh

COVID-19 hri leng mek avangin Serchhip District-ah COVID-19 dona atana thawk tura mahni-a inpe mi 4 awm tawhin heng bakah hian midang 38 te pawhin COVID-19 dona atana thawk tura sawmna chhangin hri leng dona a thawk turin an inpe tawh bawk.

Serchhip CMO Office atanga thu kan dawn danin COVID-19 hri leng avanga Mizoram in harsatna kan tawh hnuah Serchhip District-ah hian Laboratory Technician mi pahnih leh Health Worker Training zo tawh mi pahnih te chu CMO Office-ah kalin hri dona atana a tul ang anga thawk turin an inpe a, Laboratory Technician te hi Serchhip P&E Veng leh Thenzawl mi te niin Health Worker te hi Serchhip Bazar Veng ami leh Chhiahtlang ami te an ni thung a, hetianga hlawh nei lova hri dona a thawk tura inpe hmasa ber kumin June 17-a Serchhip in a neih hnu hian midang te pawh inpe chhunzawmin Vawiin thlengin heng mite hian hna an la thawk chhunzawm zel a ni.

Mizoram-a hri leng in ziaawm lam ala pan theihloh avang leh hri kai hmuhchhuah an la pun zel avangin sawrkar hotute chuan mi tlawmngai leh thiam bik nei te chu COVID-19 hrileng dona atana thawk tura sawmin he sawmna hi chhangin Serchhip District-a mi 38 te chu an inpe tawh bawk a, heng inpe te hi COVID-19 hri kai enkawlna hmun, CCC leh DCHC-a thawk turin Doctor 2, Nurse 8, Health Worker 6 leh Helper 12 te niin Monitoring Team-a thawk turin Doctor 2 leh Nurse 2 bakah Sample Collection Team-a thawk turin Laboratory Technician mi 1, Health Worker 2, Data Entry Operator mi 2 leh Driver mi 2 te an ni a. Heng hri leng dona hna thawk tura inpe te zingah hian Serchhip District mi bakah District pawnlam mi thahnem tak an tel thu CMO Office a thawktute chuan an sawi bawk.

Serchhip CMO Office-a thawktute chuan heng hri dona kawnga thawk tura inpe te hi thuneitu sang zawk hnenah thlen an nih thu sawiin, a tul anga koh reng an nih tawh thu leh tunah chuan hlawh nei lova thawk an nih thu sawiin, lawmman erawh pek an ni dawn tih an sawi a. Heng mite tana sawrkar hna nghet pek chungchang erawh engmah intiamkamna a awmloh thu an sawi bawk.

Hetihlai hian Serchhip District-a COVID-19 hri kai enfiahna tur, TrueNat Quattro RT-PCR (Mini RT-PCR) bun fel tawh chu naktuk atang khian hman tan tum a ni bawk.

Comments

Chhiar Hlawhte