Hri kai pakhat hmuh belh

Niminpiah khan Serchhip District-ah COVID-19 hri kai mi pakhat hmuhchhuah leh niin Serchhip District-a hri kai hmuhchhuah chu mi 19 tlingin mi 8 enkawl mek an ni.

Serchhip CMO Office atanga thu kan dawn danin niminpiah khan Serchhip District-ah Rapid Antigen Test hmangin Sample 22 enfiah niin heng atang hian hri kai pakhat hmuh a ni a, hri kai hmuhchhuah hi Chhingchhip Mualpui mi, Assam Regiment niin kum 24-a upa, chawlh hmanga rawn haw niin Pathianni khan Serchhip a rawn thleng a, Tourist Lodge, Serchhip-ah khunghran nghal niin Thawhtanni-a Rapid Antigen Test hmanga enfiah a nih hnuah hri a kai tih hmuhchhuah a ni a, Serchhip Tarpi Tlang SIRD-a DCHC-ah enkawl tura dah nghal a ni.

Heti hian Serchhip District-ah COVID-19 hri kai hmuhchhuah zawng zawng chu mi 19 an tling ta a, tunah hian mi 8 te chu enkawl mek niin mi 11 te erawh enkawl dam an ni tawh thung a. Serchhip District-a hri kai enkawlna hmunah hian District dang atanga hri kai enkawl tur rawn dah belh ve reng an nih avangin tun dinhmun a Serchhip District-a hri kai enkawl zawng zawng chu mi 25 an ni thung a, SIRD DCHC-ah mi 5 enkawl mek niin Nursing School CCC-ah mi 13 leh Thenzawl AYUSH Hospital CCC-ah mi 7 enkawl mek an ni bawk.