Chanchin thar thenkhat :

Bairabi-ah RAT hman duh

Bairabi Sub-Hqrs. MZP hruaitute chuan nimin khan Health Minister, Dr. R. Lalthangliana chu a Office-a hmuin Bairabi-ah Rapid Antigen Test hman ve an duh thu ngenna siamin an thlen a, Health Minister hian an ngenna hi awm a tihpui thu lo hrilhin Health Services Director, Dr. Lalchungnunga hnenah a tir a, Health Service Director hi hmu nghalin hmalak nghal a nih tur thu alo hrilh bawk a ni.

TrueNat khawl hmang tan

Mizoram sawrkar in Mizoram District 10 a District Hospital-ah te TrueNat Quattro RT-PCR (Mini RT-PCR) bun tura ruahmanna a siam tawh angin heng District 10 zinga a hmasa ber atan nimin khan Lawngtlai District Hospital-a TrueNat khawl chu hman tan a ni ta a, a bul tanna atan nimin khan Sample pathum (3) enfiah niin Lawngtlai District Medical Superintendent chuan nikhat-ah Sample 20 atanga 30 vel enfiah theih a nih dawn thu a sawi bawk.

Inthlanna neih turin puang

Mizoram State Election Commission chuan AMC huamchhunga Local Council inthlanna la neihlohna, Ramhlun South LC-ah tun thla ni 10 khian inthlanna neih turin a puang a, ruahman ang chuan tun thla ni 10 zing dar 7:00 atanga tlai dar 5:00 chhungin mipui ten Vote thlakin Vote tla te hi chhiar nghal tura ruahman niin inthlanna a thlantlin te chuan a tukah Executive Body an siam nghal dawn a ni.

VC/LC Term thar intan dawn

Mizoram District 9-a Village Council leh Local Council dinglai te term chu nimin khan a tawp ta a, tunhnaia VC leh Local Council thlanna neih tuma thlantlin te chuan Vawiin atang hian an term an hmang ve tan dawn a ni. Tarlan tawh thin angin heng VC leh LC te Term hi dan pang-ngai ah chuan May ni 7 khan tawp tawh tur a ni a, amaherawh chu hri leng avanga inthlanna neih theih a ni tak loh avangin tum hnih pawhsei a ni tawh a ni.

Hming vuah a ngai tih sawi

MNF General Hqrs. chuan nimin khan thu-chhuah siamin Assembly Session-a Chief Minister, Zoramthanga’n ‘Peace Bonus te, BAFFACOS hming te chu ka phuahchawp a ni’ a tih chu thilmak leh rintlak loh ang deuhthawa sawi a awm thu an tarlang a. “Pawisa dilna tur project reng reng an siam chan hming a neih a ngai a. Chu project hming tur chu a siamtuten an phuah a, a hmingah an vuah ngei ngei tur a ni,” tiin NLCPR pawisa pawh nise, project siama a hming phuaha tih kher loh chuan pawisa pek ngaihna a awm lo tih an tarlang bawk.

ZPM Thalai ten ngen

ZPM Thalaite chuan National Bamboo Mission Guideline kalha chhungkaw tam tak Mau chin tir an nih chungchangah Chief Minister-in 'risk' an lak thu Assembly Session-ah a puang tih thuchhuah siama tarlangin, hei hi a hlawhtlin loh chuan an fairel bel ruak mai thei dinhmuna an din avangin Mau than dan tur chungchang ah CM hian 'assurance' a pe theilo a nih pawhin 'insurance' tal pe thei se, nakina a hralhna leh a rate ah buaina an tawh lohna turin 'buy back agreement' pawh siampui tura an ngen thu an tarlang bawk.

SMATEE dil hun pawtsei

Mizoram State Quota Professional course hrang hrang NEET leh JEE in a huam loh te zirtur thlanna tur, State Medical and Technical Entrance Examination (SMATEE), 2020 dilna thehluh theih hun chu Sept. 11, 2020 chawhnu dar 2:00 thleng atan pawhsei a ni.

BDO in puanthui khawl leh Dawhkan pe

Khawzawl BDO leh MzSRLM Block Mission Director ni bawk, Dr. Saithangpuia chuan nimin khan Khawzawl RD Block hnuaia Rabung Village Organisation te hnenah Puanthui khawl panga (5) leh a dahna tur Dawhkan paruk (6) a pe a, Rabung-a Livelihood Coordinator te chuan hetianga puanthui zirna an hawn-ah an mamawh te hriaa BDO in a pe chu an lawm tih an sawi a, Rabung VO te chuan an khawchhunga mi harsa ten hmun hla zawk pan ngai lova puanthui an zir theihna tura an hmalakna te an sawi bawk.