Serchhip District-ah VC Body siam thei vek

Serchhip District-a Village Council inthlanpui neih a nih atanga chawlhkar khat a liam hnu nimin thleng khan inthlanna a lungawilohna thlen awm lovin VC Executive Body din theilo an awmlo nia thudawn a ni.

Serchhip DC Office Election Branch atanga thu kan dawn danin Ningani kalta-a Serchhip District chhung VC 54-a Inthlanpui neih a nih atanga chawlhkar khat a liam hnu nimin thleng khan Serchhip District chhunga inthlanna neihna VC hrang hrang atang hian inthlanna a lungawilohna emaw, Vote chhiar that phutna emaw pawh engmah dawn an nei lova, hei bakah hian thuneitu sang zawk lama lungawilohna thlen thawm pawh a awm an hriatloh thu sawiin, inthlanna atana hman bungrua te pawh an hnen a thleng fel tawh nia thudawn a ni bawk.

Hetihlai hian Serchhip District-a Village Council hrang hrangte hian VC Executive Body hi an din fel tawh nia thudawn a ni bawk a, Serchhip DLAO Office-a thawktute chuan Serchhip District chhunga VC 54 te atang hian VC Executive Body an din fel thu hi ziaka an dawn tawh thu leh hei hi Aizawl lamah an thawnthlak tawh thu an sawi a. Khawi atang mah VC Executive Body din theihloh a awmloh thu sawiin, tun thla ni 7 ralhmain VC thar te chuan an mawhphurhna lain hemi hnu hian VC thar te hian thutkhawm hmasa ber neiin Secretary leh Tlangau tur pawh an ruat zui tur thu an sawi. Village Council din thar te chungchangah zawhna chhangin, heng VC ding thar te hian VC hlui atanga mawhphurhna chhawm tur an neihloh avangin VC dinglai term a tawp rualin VC mawhphurhna hi an la nghal mai tur nia an ngaih thu an sawi bawk.

Comments

Chhiar Hlawhte