Hri kai enkawl dam 3 awm

Darkar 24 kalta chhungin Serchhip-a CO-VID-19 hri kai enkawl dam mi 3 te chu anmahni enkawlna hmun atangin chhuahtir an ni.

Serchhip CMO Office atanga thu kan dawn danin Serchhip Tarpi Tlang SIRD DCHC-a COVID-19 hri kai enkawl pakhat chu enkawl dam a nih hnuah nimin khan DCHC atang hian chhuahtir a ni a, he hri kai enkawl dam hi Assam atanga rawn haw Sipai niin August 15, 2020 khan Serchhip rawn thlengin August 16, 2020 khan Rapid Antigen Test hmanga enfiah a nih hnuah hri an kai tih hmuhchhuah a ni a, DCHC-ah hian dahluh a nih hnuah a Sample enfiah leh niin hri a kai tawhlo tih nemngheh a nih hnuah nimin khan chhuahtir a ni ta a ni. Serchhip District-ah hian COVID-19 hri kai hmuhchhuah mi 15 an awm tawh a, nimin thleng khan mi 11 enkawl dam ni tawhin tun dinhmunah hri kai enkawllai mi 4 an la awm a ni.

Hetihlai hian Serchhip Nursing School COVID Care Centre (CCC)-a hri kai enkawl mi pahnih te chu nimin khan chhuahtir an ni bawk a, heng te hi District dang-a hri kai hmuhchhuah leh Serchhip Nursing School CCC-a enkawl tura rawn dah niin ni 10 an inkhung hnuah niminpiah khan Rapid Antigen Test hmanga enfiah leh niin hri an kai tawhlo tih nemngheh a nih hnuah nimin khan chhuahtir an ni ve leh ta a. Nursing School CCC-ah hian nizan hmasa khan midang 6 rawn dah thar an awm thung a ni.

Serchhip District-ah COVID-19 hri kai enkawllai mi 21 an la awm mek a, SIRD DCHC-ah mi 4, Nursing School CCC-ah mi 10 leh AYUSH Hospital Thenzawl CCC ah mi 7 te an ni.