Serchhip District-ah ni 2 chhungin hri kai mi 12 hmuh niin hri kai hmuhchhuah 48 an tling tawh

Inrinni-a Serchhip District-a Sample enfiah atangin COVID-19 hri kai mi 4 hmuh belh leh niin Zirtawpni khan hri kai mi 8 hmuh belh an ni bawk a, Serchhip District-a hri kai hmuh tawh zawng zawng chu mi 48 tling tawhin hri kai zinga mi 16 te chu enkawl dam an ni tawh thung.

Thudawn danin Inrinni khan Serchhip TrueNat Laboratory-ah Sample 9 enfiah niin heng atang hian hri kai mi pahnih hmuh an ni a, heng mite hi BSF Sipai ve ve niin kum 29-a upa ve ve an ni a, Assam atanga tun thla ni 14-a Serchhip District-a rawn lut niin Serchhip an rawn thlen hnuah TKS Camping Centre-a khunghran niin hri an kai tih hmuhchhuah a nih hnu hian Nursing School CCC-ah dahluh nghal an ni.

Inrinni vek khan Rapid Antigen Test hmangin Serchhip District-ah Sample 20 enfiah niin heng atang hian hri kai pahnih hmuh a ni bawk a, hei kai hmuhchhuah pakhat hi mipa niin Manipur atanga rawn haw niin tun thla ni 25 khan Serchhip District a rawn thleng a, mahni In lama inkhung-hrang nghal a ni. Rapid Antigen Test hmanga hri kai hmuhchhuah pakhat hi hmeichhia niin Frontline Worker, Sample Collection Team ami niin Health Department hnuaia thawktute tana inkhunghranna tur hmun siam-a inkhunghrang lai a ni thung a, heng hri kai mi 2 te hi hri an kai tih hmuhchhuah a nih hnuah Chhiahtlang CCC-ah dahluh nghal an ni bawk.

Hemi hma Zirtawpni-a Serchhip District-a Sample enfiah  atangin hri kai mi 8 hmuh an ni bawk a, Zirtawpni khan Serchhip-a TrueNat Laboratory-ah hian Sample 22 enfiah leh niin hri kai hmuhchhuah thar 8 te hi BSF Sipai vek niin kum 26 leh 55 inkar an ni a, State atanga rawn lut niin tun thla ni 10 khan Serchhip an rawn thleng a, Serchhip an rawn thlen hnu hian TKS Camping Centre-ah khunghran nghal niin Zirtawpni-a an Sample enfiah anih hnuah hri an kai tih hmuhchhuah a ni a, BSF Sipai COVID-19 hri kai enkawlna hmun, Nursing School CCC-ah dahluh nghal an ni a, an vai hian natna langchhuak lo vek an ni. Heng mite hi a hmaa Rapid Antigen Test hmanga enfiah an nih hnuah hri lakah hian an fihlim nia hriat an ni a, amaherawh chu hri kai hmuh-chhuah tawh te nen an lo inkawmhnaih atangin hri hi an kai leh a ni. Zirtawpni vek khan Serchhip District-ah hian RAgT hmangin Sample 5 enfiah niin hri kai hmuhchhuah erawh an awmlo thung.

Heti hian nimin thleng khan Serchhip District-a COVID-19 hri kai hmuhchhuah chu mi 48 an tling tawh a, an zinga mi 16 te chu enkawl dam ni tawhin midang 32 te chu enkawl mek an ni a, District pawnlam atanga rawn dah te nen tun dinhmuna Serchhip District-a hri kai en-kawl chu 44 an ni thung.

Comments

Chhiar Hlawhte