Serchhip District-ah Jal Jeevan Mission leh Swachh Bharat Missions hmalakna thlirho a ni

Serchhip District Water & Sanitation Missions chu nimin tlai khan thukhawmin Serchhip District chhunga Jal Jeevan Mission (JJM) hnathawh leh Swachh Bharat Missions (SBM) hmalakna te an thlirho.

Serchhip DC Meeting Hall-a thutkhawm hi District Bawrhsap, Kumar Abhishek IAS chuan hmanpuiin Er. F. Lalsanglura, Sr. EE, PHE Serchhip WATSAN Division leh Member Secretary ni bawk chuan District Water & Sanitation Missions leh a hnuaia hnathawh tlangpuite a sawifiah a. Hemi hnu hian PHE East Lungdar Sub-Division-a SDO, PB. Lalnunsanga chuan he Missions kalpui dan chipchiar sawifiahin, Jal Jeevan Missions, Serchhip District a kalpui tawh leh kalpui zel dan tur ruahmanna te sawifiahna a nei leh a ni. 

He hmalakna hnuaiah hian kum 2019-20 chhungin Jal Jeevan Missions (Functional House Tap Connection) hi khaw 19-ah kalpui niin heng zinga khaw pali (4) te hi la zawhfel loh deuh an ni a. Kumin October thla chhunga zawh hman tuma ruahmanna kalpui mek an ni. Heng khaw 19 a hmalak nan hian cheng nuai 793.75 sen an ni. Hei bakah hian khaw pasarih-ah he hmalakna hi thawh ve leh tura ruahmanna siam a ni a; chung khua te chu Rullam, Neihloh, Tuichang, E. Bungtlang, Ngentiang, Hualtu leh Chekawn te an ni a, sum ruahman pawh cheng nuai 1800 vel a ni ang. Jal Jeevan Missions hi chhungkaw tinte hnena Tui Connection pek vekna tura sawrkar laipui ruahmanna a ni.

He thutkhawm ah hian Swachh Bharat Missions-a Serchhip District Coordinator, Samuel Lallawmzuala chuan Serchhip District chhunga Swachh Bharat Mission (Gramin) hmalak tawh dan leh hmabak ruahman te sawifiahna a nei bawk a. Swachh Bharat Missions (Gramin) hi Serchhip District-ah khaw 35-ah kalpui a ni a. Heng khua ah te hian Community Dustbin te, Solid Waste Collection Centre te leh Community Sanitary Complex te sak vek tawh an ni. Swachh Mahotsav 2019-ah Serchhip District chu a titha pathum (3) zinga thlan a ni a, Survekshan Gramin 2019-ah Small State Category-ah pahnihna niin tunah hian Prime Minister Award dawng thei tura rampum huapa thlanchhuah 10 zingah tel mekin endikna hi kalpui chhoh mek zel a ni. World Bank atanga tanpuina (Incentive) hmuh hmangin chhungkaw 1000 hnenah Ek In thawmthatna pek an ni dawn a, Community Sanitary Complex 12 thawmthat a ni bawk ang. He thutkhawm-ah hian kum kal meka Swachh Bharat Mission (Gramin) hnuaia hmalakna tur ruahmanna te pawh sawiho niin members ten uluk takin hmalak zel dan tur an rel a ni.

Comments

Chhiar Hlawhte